Сыырдаахтааҕы “Айылгы” сынньалаҥ киинин иһинэн үлэлиир бэйэни сайыннарыы “Ымыычаан” куруһуогун оҕолоро Олоҥхо ыйыгар ыалынан кэрийэн олоҥхолоотулар.
Куруһуок салайааччыта СӨ култууратын туйгуна, уус-уран салайааччы Анна Неустроева бу курдук кэпсиир:
– 2012 сыллаахха дойдубар кэлэн үлэлиэхпиттэн ыла, оҕо дьоҕурун, ис кыаҕын арыйар куруһуогу тэрийиэхпин баҕарбытым. Ол эрээри оҕолорго чугаһаабатаҕым. Кэлин өйдөөбүтүм – оҕолорбут фольклор, ырыа өттүгэр биллэрдик хаалаары гыммыттар дуу диэн санааҕа кэлбитим. Онон хайаан да фольклор эрэ буолбакка, оҕо ис дьоҕурун, кистэлэҥ баҕатын көбүтэн, куруһуок тэрийбитим. Холобур, Лилиана Заболоцкая “Мини-мисс” күрэҕи ыыппытын сэргээбиттэрэ. Кэнсиэрдэргэ кыттан араас үҥкүүлэри, ырыалары толорон, бары төрүт үгэс ньыматынан хомуска оонньоон “уһуктан” барбыттара. Баҕалаах оҕолору түмэн олоҥхолоон да бардыбыт.
Ол курдук тэриллибиттэрэ сыл аҥаара буолбут «ымыычааннар» ыалынан сылдьан олоҥхолуур бырайыагынан “Чуораанчык” уһуйааҥҥа, икки ыалга киирэн олоҥхолоон аастылар. Өбүгэ үгэһинэн ыаллар оҕо олоҥхоһуттары олус үөрэ, минньигэһинэн күндүлүү көрүстүлэр. Сцена бэтэрээнэ, ытык саастаах Елена Протопопова алгыһын анаата. Кини алаастарынан кэрийэн үс түүннээх күн олоҥхо толороллорун көрбүтүн-истибитин кэпсээтэ. Бэл сүргэтэ көтөҕүллэн тойук туойда.
«Ымыычааннар» Анжела Слепцова, Дарина Слепцова, Сайаана Неустроева, Виолетта Бурцева,Рианна Бурцева уонна 5-с кылаас үөрэнээччилэрэ Лилиана Заболоцкая, Анжела Петрова, Ирияна Неустроева, 1-кы кылаас үөрэнээччитэ Леонгард Неустроев суруйааччы Ульяна Бурнашева – Уйана “Кустук өҥнөөх Кулунчук” олоҥхотун үрдүк таһымҥа толордулар. Салайааччылара Анна Неустроева инникитин бырайыагы салгыы киэҥник сайыннарар баҕалааҕын биһирээтим.
Ульяна Бурнашева, уопсас. кэрэсп. Кэптэни