Бүгүн оҕо улуустааҕы бибилэтиэкэтигэр Мүрү 2-с №-дээх орто оскуолатын 10-с кылааһын үөрэнээччитэ кыра сааһыттан суруйар дьоҕурдаах Вика Макеева бастакы кинигэтэ сүрэхтэннэ.
Вика «Мүөттээх Мүрү» кинигэтигэр оҕолуу истиҥ, ыраас иэйиитинэн хоһуйбут хоһоонноро, кэпсээннэрэ киирдилэр. Кинигэ Оҕо өрөспүүбүлүкэтээҕи бибилэтиэкэтин иһинэн «Ааҕар оҕолор» бырайыагынан 30 ахсаанынан бэчээттэммит уонна электорннай көрүҥүнэн күн сирин көрдө.
Вика кинигэтин чугас дьүөгэлэрэ – Мүрү 1-гы №-дээх орто оскуолатын 10-с “в” кылааһын үөрэнээччитэ Ангелина Яковлева, Мүрү 2-с №-дээх орто оскуолатын 10-с “б” кылааһын выпускницата, билигин Кытайга үөрэнэ сылдьар Аня Сивцева уруһуйдарынан киэргэппиттэр.
Оҕо сааһыгар кинигэ бэчээттэтэн умсулҕаннаах айар үлэтин саҕалаабыт эдэркээн ааптар үөрүүтүн үллэстэ үгүс киһи тоҕуоруста. Улуус дьаһалтатыттан саҕалаан үүнэр ыччаты иитиигэ, сайыннарыыга үлэлэһэр бары эйгэлэртэн, үөрэнэр оскуолатын үлэһиттэрэ, аймахтара ис сүрэхтэриттэн эҕэрдэлээн, ааптар кыыска үтүмэн истиҥ, кэрэ тыллары анаатылар. Учууталлара Вика үөрэҕэр туйгунун, араас биридимиэттэргэ олимпиадаларга ситиһиилэрин, элбэҕи ааҕарын, бэйэтин сааһыгар наһаа дуоспуруннааҕын, эппиэтинэстээҕин, төрөөбүт тылынан сайаҕастык саҥарарын, коллекционер дьарыгын иэйэн-куойан кэпсээтилэр. Ону бибилэтиэкэ эркинигэр турбут Вика быыстапката туоһулаата.
Оттон Вика дьоҕурун сайыннарары өйөөбүт ийэтигэр, оскуолатын учууталларыгар, улуус хаһыатын редакциятыгар уонна кинигэтин бэчээттэтэргэ көҕүлээбит оҕо бибилэтиэкэтин үлэһиттэригэр махтанна.
Бу кинигэ кыысчаан айар үлэтигэр умсулҕаннаах суолу арыйыаҕа, өссө да саҥа айымньылар айыллан, сурукка, бэчээккэ тиһиллэн, биллэр-көстөр ааттаах суруйааччы тахсыаҕа диэн эрэнэбит, күүтэбит.
Мария Аргунова