Бороҕоҥҥо Лөгөй Тойон аатынан киин болуоссат тутуутугар күн бүгүн үлэ тохтообокко ыытыллар. Манна эһиил дьиэ кэргэнинэн, оҕо аймах, ыччат түмсэр кафелаах, оҕо оонньуур дьиэлээх-уоттаах аныгылыы көстүүлээх саҥа болуоссат килбэйиэхтээх. Болуоссаты саҥардыыны өссө 2025 сыллаахха Мүрү нэһилиэгин дьаһалтата, баһылык Прокопий Румянцев Бүтүн Россиятааҕы «Создание комфортной городской среды» бырайыактар күрэстэригэр кыайан, үбүлээһинэ көрүллэн, быйыл атырдьах ыйыттан сүрүн үлэтэ саҕаламмыта.
Оттон быйыл ыытыллыахтаах уонна бүтүөхтээх үлэ былаанын туһунан Прокопий Федотович бу курдук билиһиннэрдэ:
– Болуоссаты тутууга барыта 70 мөл. 132 тыһ солк. үлэ барыахтаах. Бэдэрээччит Александр Викторович Осипов салайыытынан үлэ тэтимнээхтик бара турар. Билиҥҥи туругунан болуоссат бетонунан толору кутуллан, үрдүнэн тротуары тэлгэтии үлэтэ улахан аҥаара оҥоһулунна. Тротуар бетон үрдүгэр ууруллар буолан, сир хамсааһыныгар бэриммэт, сыыс от үүммэт гына толкуйданан оҥоһулла сылдьар. Болуоссат олбуордааһын улахан өттө бүттэ. Маны тэҥэ икки этээстээх павильон каркаһа, бетонун кутуута, сэндвич панелынан бүрүллүүтэ бүттүлэр, билигин түннүктэрэ олордуллар. Тас өттө металлокассетанан бүрүллүөҕэ уонна Лөгөй Тойон уобараһынан декоративнай оҥоһук туруоҕа. Алта саҥа уот ситимин остуолбата турда, трансформатор көһөрүлүннэ, кабель тардыллан бүттэ. Бу ыытылла турар үлэлэр күүстээх тымныылар буолуохтарыгар диэри барыахтара. Эһиил 2027 сылга сэтинньигэ диэри болуоссат силигэ барыта ситиэхтээх. Бу бырайыагынан, икки этээстээх павильон аллараа өттө аһыыр сир, үөһэ оҕо оонньуур зоната буолуохтаах. Маны тэҥэ күрүөлээһинэ уонна сырдатыыта, асфальт суол, парковка, пандус, павильон ис үлэтэ эһиил салҕаныахтара.
Бу курдук олорор сири-уоту тупсарыыга анал бырайыактарга кыттан, улууспут киинэ Бороҕон сылтан-сыл сайдан иһэригэр уонна дьон-сэргэ олохсуйар, үлэлиир-хамсыыр сөптөөх усулуобуйатын тэрийиигэ былааннаах үлэ ыытыллар.
Екатерина Захарова