Түүлээххэ алтынньы устата аҕа саастаах дьоҥҥо аналлаах “Көрсүһэр үтүө түгэннэр” диэн декада буолан ааста. Декада арыллыытыгар «төгүрүк остуол» тула олорон ирэ-хоро кэпсэтэн, урукку кэмнэри кэрэһэлиир хаһыат, сурунаал быыстапкатын сэҥээрэ көрдүлэр, ааспыт кэм ырыаларын дуоһуйа ыллаатылар.
Декада устата көхтөөх ветераннар мустаннар, Уус Алдан улууһун нэһилиэктэрин бэтэрээннэрин түмсүүлэрин икки ардыларыгар уус-уран самодеятельноһы көрүүгэ “Кэхтибэт талааннар” бэстибээл кэнсиэригэр кыттарга бэлэмнэннилэр. Саргылаана Богдакумова аҕа саастаах эдьиийдэрбитигэр макраме өрүүтүгэр маастар кылаас ыытта.
Декада иһинэн ититии ситимэ тиийэ илик кырдалларга олорор аҕам саастаахтарга нэһилиэккэ таһаарыылаахтык үлэлиир “Айаана” эдэр ийэлэр түмсүүлэрэ (сал. М.А. Винокурова) хомуйбут туостарын 15 ыалга биирдии куулунан түҥэттилэр. Өссө олохтоох врачебнай амбулатория үлэһиттэрэ дьиэлэринэн сылдьан кырдьаҕастар доруобуйаларын көрдүлэр-иһиттилэр. Биир күн умнуллан эрэр остуол оонньуута – лото – оонньонно.
Саха сирин Ийэлэрин, Арассыыйаҕа Аҕа уонна Ырыаны толоруу аан дойдутааҕы күннэригэр аналлаах “Ыллаа, олох кэрэтин” диэн бэрт сэргэх тэрээһин буолан ааста. Тэрээһини Мария Винокурова ылбаҕай ырыатынан эҕэрдэлээн арыйда. Атыы-тутуу дьаарбаҥката, атыылааччы да, атыылаһааччы да элбэх буолан, көхтөөхтүк ыытылынна. Биир аҕа, алта ийэ кыттыылаах бэрт сэдэх музыкальнай лото оонньонно. Манна кыайыылааҕынан Лилия Бочурова, Константин Стручков буоллулар, иккис миэстэ – Июлия Охлопкова, үһүс миэстэ – Анна Спиридонова.
Түүлээх нэһилиэгин дьахталларын “Иэйии” хамсааһынын көҕүлээһининэн анал байыаннай дьайыыга сылдьар уолаттарга анаан харчы хомуйан саппыкы таһынан кэтэр 15 устуука кээнчэ уонна мал угар 50 устуука мөһөөччүк тиктилэр, бэтэрээннэр бу тэрээһинтэн туора турбатылар.
Аҕам саастаахтар декадаларын түмүктүүр тэрээһин бэрт сэргэхтик ааста. «Түүлээх нэһилиэгэ» тыа сирин түөлбэтин баһылыга Станислав Винокуров нэһилиэкпит көхтөөх бэтэрээннэригэр махтал суруктары туттарда. «Айаана» эдэр ийэлэр түмсүүлэрэ бэйэлэрин илиилэринэн оҥоһуктарын бэлэхтээтилэр. Бу киэһэ оонньоон, үҥкүүлээн сэргэхсийэн тарҕастылар.
Туяра Ушницкая, уопсас. кэрэсп.