Алтынньы 22 күнүгэр улуустааҕы социальнай кэлим киин оҕону уонна дьиэ кэргэни кытары үлэлэһэр отделениетын тэрийиитинэн 2-с Байаҕантай нэһилиэгэр Тиит Арыыга уонна Байаҕантай нэһилиэгэр Тандаҕа «Барыта дьиэ кэргэн туһугар» социальнай десант буолан ааста.
Бу маннык десант тэрилтэ социальнай партнердарын кытары холбуу нэһилиэнньэҕэ социальнай, педагогическай, медицинскэй, психологическай өҥөлөрү оҥоруу нөҥүө көмөлөһөр сыаллаах тэриллэр.
Тэрээһин аан бастаан сарсыарда өттүгэр Тиит Арыы сүрүн оскуолатыгар буолла. Киэҥ-куоҥ саалаҕа мустубут дьон иннигэр тахсан оскуола дириэктэрэ Ольга Аргунова уонна нэһилиэк баһылыга Андрей Егоров суолталаах тэрээһин саҕаламмытынан эҕэрдэлээтилэр, маннык десант наадалааҕын ыйдылар, бүгүҥҥү күҥҥэ ситиһиини баҕардылар.
Салгыы кылаастарынан оҕолору кытары көрсүһүүлэр: алын сүһүөх кылаастарга Бороҕоннооҕу баһаарынай сулууспа 34№-дээх отделын инструктора Саргылана-Авелина Атласова “Пожарная безопасность в ОУ и в жилых домах” бэсиэдэ, 5-6 кылаастарга социальнай педагог Лиана Иннокентьева “Мои права и обязанности. Безопасное детство” бэсиэдэ, 7-9 кылаастарга педагог-психолог Туяра Жиркова “Мои эмоции и чувства” тренинг, 5-9 кылаастарга ПДН инспектора Наталья Николаева “Правовой час” бэсиэдэ, 5-9 кылаастарга улуустааҕы психологическай киин социальнай педагога Доминика Егорова “Профилактика ПАВ” бэсиэдэ барыта 41 оҕону хабан ыытылыннылар.
Төрөппүттэргэ уонна педагогтарга анаан төгүрүк остуол 6 төрөппүтү, 15 педагогу хабан ыытылынна. Күн иккис аҥарыгар үлэ Танда орто оскуолатыгар салҕанна. Аактабай саалаҕа үрдүк сценаттан оскуола дириэктэрэ Константин Готовцев уонна нэһилиэк баһылыгын солбуйааччы Анатолий Готовцев дьиэ-кэргэн туһугар олус наадалаах десант үлэтэ саҕаламмытынан эҕэрдэлээтилэр, маннык үлэ туһалааҕын ыйдылар, бүгүҥҥү күн көдьүүстээх буоларыгар баҕа санааларын тириэртилэр.
Салгыы кылаастарынан оҕолору кытары көрсүһүүлэр: сүһүөх кылаастарга Бороҕоннооҕу баһаарынай сулууспа 34№-дээх отделын инструктора Саргылана-Авелина Атласова “Пожарная безопасность в ОУ и в жилых домах” бэсиэдэ (14 оҕо), 5-6 кылаастарга социальнай педагог Лиана Иннокентьева “Мои права и обязанности. Безопасное детство” бэсиэдэ (11 оҕо), 7-9 кылаастарга педагог-психолог Туяра Жиркова “Мои эмоции и чувства” тренинг (18 оҕо), 5-11 кылаастарга ПДН инспектора Наталья Николаева “Правовой час” бэсиэдэ (45 оҕо), 10-11 кылаастарга улуустааҕы психологическай киин социальнай педагога Доминика Егорова “Профилактика ПАВ” бэсиэдэ (18 оҕо) ыытылыннылар.
Маны таһынан дьиэнэн патронаж, баҕалаах оҕолорго психолог индивидуальнай консультациялара буоллулар. Төрөппүттэргэ уонна педагогтарга анаан ыытыллыбыт буруйу оҥорууну, бэрээдэги кэһиини утары өйдөтөр-сэрэтэр үлэ, итиэннэ оҕону дьиэ-кэргэҥҥэ иитиигэ төрөппүт, оскуола оруолларын туһунан төгүрүк остуолу стационарнай отделение сэбиэдиссэйэ Светлана Бурцева салайан ыытта. Барыта 36 улахан киһи кыттыылаах, үгүс ыйытыылардаах, элбэх этиилэрдээх, санаа үллэстиилээх кэпсэтии буолла. Икки сиринэн ыытыллыбыт төгүрүк остуол түмүгүнэн билиҥҥи төрөппүтү даҕаны, учууталы даҕаны долгутар, толкуйдатар ыйытыы олус элбэх эбит.
Оҕоҕо мэһэйдиир тэрилинэн төлөпүөн буолара, күннээҕи режими тутуһууга төрөппүт өттүттэн хонтуруол ситэтэ суоҕа, бириэмэни халтайга ыытыы элбэҕэ билигин сүрүн кыһалҕа буолара тоһоҕолоон этилиннэ. Учуутал дьон оҕо туһугар боппуруостары сытыытык туруордулар, төрөппүттэр маннык кыһалҕа баар диэн аһаҕастык эттилэр.
Икки нэһилиэк дьаһалталарын уонна оскуолаларын кытары салгыы бииргэ үлэлээһиҥҥэ сөбүлэҥ түһэрсилиннэ. Онон бу хайысхаларга былааннаах үлэ салҕанан барыаҕа. Тэрилтэ аатыттан барыларыгар махтал сурук уонна дьиэ-кэргэни, оҕону кытары үлэни тэрийиигэ методическай көмө туттарылынна. Маннык үс өрүттээх бииргэ үлэлээһин баар буоллаҕына, дьиэ-кэргэн олоҕун таһыма тупсуутугар ыытыллар үлэ көдьүүстээх буолара саарбаҕа суох.
Светлана Бурцева, уопсас. кэрэсп.