Ыал, дьиэ кэргэн – хайа баҕарар общество туллар тутааҕа. Өй-санаа, эт-хаан өттүнэн чөл туруктаах саҥа көлүөнэни иитэн таһаарыы – хас биирдии ыал олоҕун сүрүн соруга буолар.
Төрөппүт оҕото киһи киһитэ буолан үүнэн-сайдан тахсарыгар кыһаллар, болҕомтотун уурар.
Билиҥҥи бириэмэҕэ киһи туохтааҕар да киэн туттар киэргэлинэн билии-көрүү буолар. Оттон билиини киһи элбэхтик үөрэнэн, ааҕан эбинэр.
«Күн аайы эбиллибэт билии көҕүрээн иһэр» диэн муударай этиинэн сирдэтэн, тиһигин быспакка дьиэ кэргэнинэн ааҕыы үгэстэрин тэрийэн оҕоҕо ааҕыы култууратын сайыннарыыга үлэлэһии буолар.
Кыра саастарыттан ааҕары таптыыр оҕолор, улаатан да баран библиотека арахсыбат ааҕааччылара буолаллара саарбаҕа суох.
Бу кэлбит сыл Россияҕа Дьиэ кэргэн, оттон өрөспүүбүлүкэбитигэр Оҕо саас, улууспутугар Аҕа сылынан биллэрилиннэ. Манна олоҕуран И.С. Портнягин аатынан Сыырдаах орто оскуолатын иһинэн тохсунньуттан саҕалаан оскуола педагог-библиотекара Маргарита Иванова уонна нэһилиэк олохтоох библиотекатын сэбиэдиссэйэ Мария Иванова көҕүлээһиннэринэн тэриллибит «Аптаах суумка» бырайыак «Ааҕар киһи – билиилээх, билиилээх киһи – сайдыылаах, сайдыылаах киһи – кэскиллээх» диэн девиһинэн үлэтин саҕалаата.
Бырайыак сыала – дьиэ кэргэнинэн ааҕыыга сөптөөх литератураны талан кинигэҕэ интэриэстээх буолууларын ситиһии.
Бырайыак соруктара:
- Дьиэ кэргэнинэн ааҕыы ньымаларын төрөппүттэри кытта ырытыы.
- Оҕоҕо сайдыылаах, дьоҕурдаах буолуутугар, кинигэ бастыҥ көмөлөһөөччү буоларын өйдөтүү.
Yлэ түмүгэ:
1. Төрөппүккэ уонна оҕоҕо ааҕыыга интэриэhи көбүтүү.
2. Дьиэ кэргэнинэн ааҕыы үгэстэрин сөргүтүү.
3. Дьиэ кэргэнинэн ааҕыы үөрүйэҕин түмүү, тарҕатыы, сырдатыы.
4. Дьиэ кэргэн тустаах кинигэлэри ааҕан бүтэрбитин кэннэ кинигэ ис хоһоонун туһунан кэпсэтиһии, ырытыһыы, кинигэ дьоруойдарын туһунан санааны атастаһыы.
Маннык ситимнээх үлэ оҕо кинигэни сөбүлээн, ылларан, болҕомтолоохтук ааҕарыгар төрөппүт өттүттэн сүрдээх улахан көмө буолар. Онон саҥа саҕаламмыт бырайыак үлэтэ таһаарыылаах, үтүө түмүктэрдээх буоллун диэн баҕарабыт.
Ньургуйаана Хорунова, иитэр үлэҕэ дириэктэри солбуйааччы