Улууспутугар спорду сайыннарыыга сүҥкэн кылаатын уурбут Уус Алдан улууһун бочуоттаах олохтооҕо, Саха АССР физкультураҕа уонна спорка үтүөлээх үлэһитэ Андрей Протопопов төрөөбүтэ 90 сылынан бүгүн кини туһунан ахтан-санаан, өйдөбүнньүк стендэтигэр сирбэкки дьөрбөтүн уурдулар.
Уус Алдан оройуонун спорка кэмитиэтин солбуллубат бэрэссэдээтэлэ (1960-1986) Андрей Андреевич 1936 сыллаахха алтынньы 25 күнүгэр Бороҕоҥҥо төрөөбүтэ.
Тэрээһиҥҥэ улуус баһылыга Василий Алексеев, спорт бэтэрээннэрэ Прокопий Харитонов, Иннокентий Мигалкин, Семен Черкашин Андрей Андреевич улууспутугар спорт сайдарын туһугар сүҥкэн кылаатын киллэрбитин туһунан иһирэхтик кэпсээтилэр. Ол курдук Андрей Протопопов ис сүрэҕиттэн кыһаллан спорт тэрээһиннэрин кыайа-хото тутарын, спорт бары көрүҥүн тэҥҥэ тутан болҕомтотун ууран үлэлэспитин, ол түмүгэр Уус Алдан спортсменнара үрдүк ситиһиилэммиттэрин, кэскиллээх спортсменнары өтө көрөр уонна өрөспүүбүлүкэ үрдүнэн спортсменнары чопчу билэр буолан, оройуоммут спортсмена, хамаандата күрэхтэһиигэ хаһыс миэстэ буолуоҕун эрдэтэн суоттаан таһаарар дьоҕурдааҕын сөҕө-махтайа бэлиэтээтилэр.
Кини өр сыллаах үтүмэн үлэтэ, үлэтигэр дьиҥнээх энтузиаст, патриот сыһыана көлүөнэттэн көлүөнэҕэ үтүө холобур буоларын туһугар Андрей Протопопов аатын үйэтитэр сыаллаах тугу оҥоруохха сөбүй диэн боппуруос тула санааларын үллэһиннилэр.
Мария Аргунова