И.С. Портнягин аатынан Сыырдаах орто оскуолатыгар үгэскэ кубулуйбут идэһэ дьаарбаҥкатын тэһийбэккэ күүтэр, кэтэһэр буолбуппут ыраатта. Бу сэтинньи (Байанай ыйын) 17 күнүгэр үөрэнээччилэр, төрөппүттэр, оскуола кэлэктиибэ, ону тэҥэ нэһилиэктэн «Эйэҕэс эбээлэр» түмсүү, «Айылгы» СК кыттыылаах, оскуола салалтата, «Кустук» биир идэлээхтэрин союһа көҕүлээн, «Идэһэ сиир дьоро киэһэ» быыстапка-дьаарбаҥканы оскуолабытыгар тэрийэн ыыттыбыт. Хаһааҥҥытааҕар да элбэх киһи тоҕуоруспутун көрөн олус үөрдүбүт.
Тэрээһин саҕаланыытыгар саха сиэрин быһыытынан боҕуруоскай оту буруолатан сыт таһааран, кэлбит дьону, оҕону-урууну арыылаах алаадьынан, саламаатынан күндүлээтибит. Бу күн маанылаах идэһэ аһын-үөлүн төрөппүттэр, эбээлэр үгүөрүтүк тардан, атыылыыр лааппылары көрүүгэ кылаастар аҕалбыт эмис, байтаһын эт эгэлгэтин, собо балыкпыт бөдөҥүн, эмиһин «Эйэҕэс эбээлэр» сыаналаатылар.
Дьаарбаҥка иккис чааһыгар Идэһэ оонньууларын физкультура учууталлара оҕо сааһыгар, төрөппүттэргэ сөп түбэһиннэрэн үс сүһүөҕүнэн аттаран тэрийдилэр. Хас да түһүмэхтээх оонньуулары нэһилиэк аҕаларын түмсүүтэ сыаналаата.
Дьаарбаҥка уонна оонньуулар түмүктэринэн алын сүһүөхтэргэ 1-кы м. – 2-с кылаас, 2-с м. – 4-с кылаас, 3-с м. – 1-кы кылаас ыллылар; орто сүһүөхтэргэ: 1-кы м. – 7-с кылаас, 2-с м. – 5-с кылаас буоллулар; үрдүкү сүһүөхтэргэ: 1-кы м. – 10-с кылаас, 2-с м. – 9-с кылаас, 3-с м. – 11-с кылаас ыллылар.
Бу күн 1–11 кылаас үөрэнээччилэрэ төрөппүттэринээн, эбээлэр нэһилиэкпититтэн анал байыаннай дьайыыга кытта сылдьар уонна кыттыыны ылан кэлбит оҕолоох, аҕалаах аҕыс дьиэ кэргэни ыҥыран истиҥ махталынан көмө ас-үөл туттардылар. Ону таһынан улууспутугар үөрэх эйгэтин үлэһиттэрин биир идэлээхтэрин союһун комитетын председателэ Анна Попова көҕүлээһининэн үөрэх салаатын бары үлэһиттэрэ «Фронтовая соточка » акцияны тэрийэн анал байыаннай дьайыыга кытта сылдьар оҕолоох, аҕалаах үөрэх эйгэтин үлэһитин дьиэ кэргэттэригэр көмө оҥордулар. Биһиги оскуолабытыттан бэтэрээн үлэһиппит Татьяна Гаврильевна Заболоцкаяҕа 10 000 солкуобайы көмө быһыытынан туттардыбыт.
Идэһэ бырааһынньыгар кыттыыны ылбыт көхтөөх төрөппүттэрбитигэр, иһирэх ийэлэрбитигэр, амарах аҕаларбытыгар, эһэлэрбитигэр, нэһилиэк бары олохтоохторугар, күн курдук ыраас санаалаах «Эйэҕэс эбээлэр» түмсүүгэ, «Айылгы» СК үлэһиттэригэр, биир өйүнэн-санаанан үлэлиир иллээх-эйэлээх кэлэктииппитигэр, оскуолабыт салалтатын уонна «Кустук» биир идэлээхтэр союзтарын ааттарыттан махталбытын тиэрдэбит.
Нюргуяна Хорунова, Сыырдаах орто оскуолатын иитэр үлэҕэ дириэктэри солбуйааччы