Бүгүн И.И. Гоголев-Дыргыабай аатынан оскуолаҕа «Sitim» видеостудия үөрүүлээх аһыллыыта «Уолан» бөлөх хоһооннорунан саҕаланна.
Ыччат Бүтүн Россиятааҕы федеральнай агентствотын күрэҕэр 98 кыттааччыттан 16 кыайыылаах ыччат ахсааныгар киирэн, Тима Арсентьев уонна кини хамаандата 250 000 солк. суумалаах граны тутан үөрүү өрөгөйүн билбиттэрэ. Онон оҕолор аныгылыы оборудованиелаах кабинекка үлэлэрин саҕалаатылар. Научнай салайааччы саха тылын учуутала Анна Федорова 2005 сылтан «Уолан» бөлөҕөр уолаттары уус-уран ааҕыыга дьарыктаан, улуустааҕы, өрөспүүбүлүкэтээҕи күрэхтэһиилэргэ ситиһиилээхтик кытталлар. Уолаттарбыт – оскуола дэгиттэр дьарыктаах үөрэнээччилэрэ, актыбыыстара, спортсменнара.
Бүгүҥҥү тэрээһиҥҥэ Анна Федорова бөлөх үлэтин, ситиһиилэрин, студия бырайыагын ис хоһоонун сырдатта. Олохтоох дьаһалта баһылыга, «Уолан» бөлөх бастакы уонна бастыҥ кыттыылааҕа Петр Слепцов үөрэхтээх, үлэһит буоларыгар уһуйбут, олук уурбут учууталларыгар махталын биллэрэн студия саҥаттан саҥа бырайыактарга үлэлииригэр ыҥырда. Оскуола дириэктэрэ Мирияна Сивцева студия бөлөҕөр анал кабинет тэрийэн, оҕолор инники сайдалларын өйүүрүн биллэрдэ, наставниктарга махтанан, үтүө санаатын эттэ. Нуучча тылын ветеран учуутала Вера Мухина үлэлиир кэмигэр салайбыт үгүс ситиһиилээх «Прометей» агитбригадатын салҕааччы «Уолан» бөлөх сүбэһитэ буоларынан, улуу нуучча тылыгар уһуйбут оҕолорун, эдэр коллегаларын үлэлэринэн киэн туттарын биллэрэн, алгыһын анаата. Саха тылын ветеран учуутала Любовь Готовцева эдэр корреспонденнар куруһуоктарыгар дьарыктаммыт оҕолоруттан өрөспүүбүлүкэҕэ биллэр суруналыыстар үүммүттэрин, эдэр коллегата Анна Федорова оҕолору төрөөбүт тылга уһуйар утумнаах үлэтигэр ситиһиини баҕарда. Бырайыак ааптара Тима ийэтэ Лариса Арсентьева оҕото доҕотторун кытта ситиһиититтэн сэмэйдик үөрэн, учууталларыгар махтанна.
Улууска, өрөспүүбүлүкэҕэ ыытыллар ырыа күрэстэрин кыайыылааҕа, студия салайааччыта Тима Арсентьев үтүө алгыстарга , баҕа санааларга махтанан, доҕотторун кытта ырыа бэлэхтээтилэр. Кабинеты арыйар кыһыл лиэнтэни Тима Арсентьев, Вера Мухина быстылар.
Светлана Петрова, ветеран учуутал, уопсас. кэрэсп. Найахы