Сотору кэминэн Мүрү нэһилиэгин иһигэр маршрутнай автобус сүүрэрэ күүтүллэр.
2023 сылга сабыс-саҥа оҥоһуллан тахсыбыт ГАЗель NEXT автобус уопсайа 21 олорор миэстэлээх. Олорор сир ахсын төлөпүөнү сэрээттиэххэ сөп. Саахал эбэтэр ыксаллаах быһыы-майгы тахсыытын суһал көмө сулууспаларыгар тута биллэрэр “Эра-глонасска” холбоммут систиэмэлээх. Оҕо уонна аҕам саастаах дьон автобуска киирэллэригэр табыгастаах буоллун диэн анал пандустаах. Массыына салонугар 180 см уһуннаах киһи төҥкөйбөккө турар кыахтаах.
Билигин автобуһу Новосибирскай куораттан аҕалар үлэ тэриллэр. Айан тарыыба, маршрута, графига оҥоһулла сылдьар. Автобус Бороҕоҥҥэ кэллэ да, аны ГАИ чэрчитинэн үлэ ыытыллыаҕа. Онон автобус сэтинньи бүтэһигиттэн сүүрүөн сөптөөҕө сабаҕаланар.
Ольга Шепелева