Алтынньы 22 күнэ – Пуобар норуоттар икки ардыларынааҕы күнэ. 2004 сыллаахха Шеф-пуобардар аан дойдутааҕы ассоциациялара бу күнү сыл аайы пуобардар күннэринэн бэлиэтииргэ быһаарбыта. Бу күн пуобардар ускуустубаларыгар күрэстэр, маастар-кылаастар, лекциялар, дегустациялар ыытыллаллар эбит. Биһиги улууска өр сылларга пуобарынан үлэлии сылдьар дьону сырдатан, идэлэрин туһунан
тугу этэллэрин иһиттибит.
Наталия МАЛЬЧЕКИТОВА, Мүрүтээҕи «Сардаана» уһуйаан пуобара:
— Уһуйааҥҥа алтыс сылын пуобарынан үлэлиибин. Бастаан Түүлээхтээҕи учаастактааҕы балыыһаҕа үлэбин саҕалаабытым. Ийэм өр кэмҥэ уһуйааҥҥа үлэлээбитэ, ол иһин да буолуо, оҕо сылдьан уһуйааҥҥа үлэлиэхпин баҕарар этим. Уһуйааммытыгар толору хааччыллыы киирбитэ үлэлииргэ да чэпчэки, усулуобуйа баар. Үлэбин олус сөбүлүүбүн, кырачаан оҕолорбут минньигэстик тото-хана аһаатахтарына – ол буолар повар киһи үөрүүтэ.
Алена МЕСТНИКОВА, Мүрү 2-с №-дээх орто оскуолатын пуобара:
— Мин бу оскуолаҕа 10-с сылбын үлэлии-хамсыы сылдьабын. Нерюнгритааҕы техникумҥа пуобар идэтигэр үөрэммитим. Сарсыарда эрдэ ким да уһукта илигинэ, чуумпуга үлэҕэ кэлэр эмиэ туспа абылаҥнаах ээ. Үлэбит сарсыарда 5:30 чаастан саҕаланар. Үлэбин сөбүлүүбүн, биһиги, пуобардар, минньигэс аһынан күндүлээн оҕолорбут дьаныардаахтык үөрэнэллэригэр, үлэһиттэр айымньылаахтык үлэлииллэригэр эмиэ күүс-көмө буолан олоҕу тутуһа сырыттахпыт.
Алла СИВЦЕВА, Найахы орто оскуолатын пуобара:
— 2006 сыллаахтан үлэлии сылдьабын, ол аата номнуо 17 сыл буолбут эбит. Оҕо сылдьан оскуолабын бүтэрэрбэр худуоһунньук буолуохпун баҕарар этим. Ол эрээри, олоҕум доҕорун көрсөммүн, олоҕум атыннык салаллыбытын кэмсиммэппин. Пуобар идэтигэр Дьокуускайга сервис техникумугар кууруска үөрэнэн 5-с категорияны көмүскээммин, анал пуобар идэлэммитим. Кырачаан оҕолор топпут, үөрбүт буоллахтарына, ол аата күнүм табыллар. Ол быыһыгар үлэ уустуктара ханна барыахтарай: сылайыы, уһун күнү быһа атахха сылдьыы уонна, дьэ, дьон иннигэр эппиэтинэс сүгүүтэ буоллаҕа…
Ол да буоллар үлэбин сөбүлүүбүн, тэҥҥэ үлэлии сылдьар көмөлөһөөччү пуобарбар Ньургуяна Сивцеваҕа, иһит сууйааччыбар Саргылаана Константиноваҕа махталым улахан. Эппиэттээх ыарахан үлэбитин тэҥҥэ ситэрсэн, көхтөөхтүк үлэлии сылдьарбытыгар махтанабын.
Михаил БОРИСОВ, «Офиснай киин» кафетын пуобара:
— Кафеҕа 2021 сылтан үлэлиибин. Ол иннинэ Мындааба оскуолатын интэринээтигэр икки сыл үлэлээбитим. Пуобар идэтигэр баҕаран туран, Дьокуускайга торговай-экэнэмиичэскэй колледжка, уруккута коптехха үөрэнэн бүтэрбитим. Практикабын «Тыгын Дархан» рестораҥҥа барбытым.Үөрэнэр кэммэр онно официанынан үлэлиир этим. Билигин 6-с разрядтаах поварбын. Повар идэтэ интэриэһинэй, күн аайы араас дьон нэһилиэктэртэн кэлэллэр, бэйэбит үлэһиттэрбит аһыыллар, банкеттар, корпоративтар, фуршеттар, дьыалабыай көрсүһүүлэр буолаллар.
Кинилэр тото-хана аһаан, үчүгэй настарыанньалаах баралларыгар кыһаллабын. Ас астааччы диэн киһи баарын тухары наадалаах идэ буолар.
Филисада КОПЫРИНА, Уһун Күөл орто оскуолатын пуобара:
— Төрөөбүт дойдум оскуолатыгар үлэлээбитим 21 сыл буолла. Повар идэтигэр араас куурустарга сылдьаммын билиибин хаҥатабын, саҥаны билэн-көрөн кэлэн үлэбэр туһанабын. Оҕолор аһыылларын наһаа кэтэһэллэр, сөбүлээн аһыылларыттан, эбилик көрдүүллэриттэн үөрэбин. Үлэбитигэр улахан уустук суох. Бастаан үлэлии киирэрбэр 40 оҕо буоллаҕына, билигин оҕобут ахсаана элбээн 105 буолла. Нэһилиэккэ оҕо элбиириттэн үөрэбит. Бары биир идэлээхтэрбэр эҕэрдэбин ыытабын. Билигин бары 10 күннээх бигэргэтиллибит менюнан үлэлиибит. Миин, соккуой, хааһы, салат, утах арааһа астанар. Оҕолор күҥҥэ иккитэ аһыыллар.
Мария Аргунова