Дүпсүн орто оскуолатын 10 кылааһын үөрэнээччитэ, И.Д. Жирков аатынан Саха сиринээҕи космонавтика уонна авиация түмэлин иитиллээччитэ Виктория Сивцева интегрированнай тиэхиньиичэскэй «Старт в космос» өрөспүүбүлүкэтээҕи V олимпиадаҕа ситиһиилээхтик кыттан, балаҕан ыйын 11-16 күннэригэр Москва уобалас Сулустаах куоратыгар үөрэтэр-чинчийэр турга баран кыттыыны ылла. Дэлэгээссийэҕэ барыта Саха сириттэн олимпиада кыайыылаахтарын уонна призердарын Уус Алдантан, Майаттан, Саха политехническай лицейиттэн, Бүлүүттэн, Амма лицейиттэн 11 үөрэнээччини Амматааҕы Л.В. Киренскэй аатынан лицей математикаҕа учуутала Мария Захарова салайан илдьэ сырытта.
Бырагыраама чэрчитинэн оҕолор олус интэриэһинэй уонна туһалаах лекцияларга, экскурсияларга, практическай дьарыктарга сырыттылар. Космонавтар мусуой дьиэлэригэр сылдьан дойдубут космонавтикатын историятын туһунан олус элбэх интэриэһинэй чахчылары биллилэр, көрдүлэр. «Мир» орбитальнай комплекска сылдьан, космонавтар Орбитаҕа хайдах олороллорун илэ харахтарынан көрдүлэр, космонавтар эрчиллэр МКС, ЦФ-18 центрифуга уонна «Союз» космическай хараабыл саалаларыгар, «Выход-2» тренажерга, гидролабораторияҕа экскурсиялар, “Перчаточный бокс” тренажерга практическай дьарыктар тэрилиннилэр.
Сулустаах куораты таһынан оҕолор Королев куоратыгар, ”Алмаз-Антей” воздушно-космическай оборона демоцентрыгар, БСНХСБ-ҕа космонавтика уонна авиация киинигэр, «Авиатор» көтөр кулуупка олус интэриэһинэй бырагырааманан сырыттылар.
Москва куоракка олорор, үлэлиир Амматтан төрүттээх, «Старт в космос» бырайыак ааптара Саргылана Егоровна Захарова-Демиденконы кытта көрүстүлэр, сэһэргэстилэр.
Үөрэнээччини бары өттүнэн сайыннарар бырагыраама олус көдьүүстээхтик түмүктэннэ. Оҕолор элбэх билиини ылан, араас интэриэһинэй дьону кытта көрсүһэн, кинилэр норуоттарыгар олус бэриниилээхтэрин уонна профессиональнай өттүнэн үрдүк таһымнаахтарын сөхтүлэр. Сулустаах куоракка сылдьыы олохторугар биир умнуллубат түгэнинэн буолла. Вика кыыс Сулустаах куоракка сылдьыбыт бэлиэтин үөрэнэр оскуолатыгар, мусуойугар өйдөбүннүьүк сувенирдары, открыткалары бэлэх уунна.
Ольга Протопопова, эбии үөрэхтээһин педагога, “Полет” куруһуок салайааччыта