Мөлтөхтүк истэр дьон ортолоругар дуобакка Арассыыйа гроссмейстера, СӨ физическэй култуураҕа, успуорка үтүөлээх үлэһитэ Дүпсүнтэн төрүттээх Петр Ушницкайга 2023 сыл үгүс ситиһиини, үөрүүнү аҕалла.
Ыам ыйын 19–31 күннэригэр Турция Кемер куоратыгар ыытыллыбыт доруобуйаларынан хааччахтаах дьон ортотугар 100 харахтаах дуобакка аан дойду V чөмпүйэнээтигэр иитиллээччилэрэ ХИФУ физическэй култуураҕа институтун 2-с кууруһун устудьуона Александр Ефимов чөмпүйүөн, түргэн оонньууга үрүҥ көмүс призер буолбута, Сайыына Юнчанова, Джулияна Андреева 100 харахтаах дуобакка I, II миэстэлэри ылбыттара.
Сэтинньигэ Петр Ушницкай олоҕун, дуобакка ситиһиилэрин сиһилии кэпсиир «Дуобат – олоҕум аргыһа» диэн 264 страницалаах кинигэ күн сирин көрдө. Кинигэни Петр Ушницкай бэйэтэ бэлэмнээбитин Дүпсүнтэн төрүттээх Эдуард Пономарев олус тупсаҕай гына оҥорон бэчээттэтэн таһаартарда. Ааптар кинигэҕэ ылсыһыытын төрүөтүнэн Дүпсүн орто оскуолатыгар 9-с кылааска үөрэнэ сылдьан дуобакка кыайан аан бастаан I истиэпэннээх диплому ылбыта 50 сыла туолбута буолбут.
Петр Петрович кинигэтин баалларына сүрэхтэн тахсар итии тапталын эппэккэ хаалбыт күндү дьонугар – төрөппүттэригэр Елена Михайловна, Петр Иванович Ушницкайдарга, убайдарыгар анаабыт. Кинигэҕэ 500 кэриҥэ хаартыска, маны тэҥэ хас да сүүһүнэн ааҕыллар наҕараадаларын хаартыскалара хаачыстыбалаахтык оҥоһуллан киирбиттэрэ ааҕааччыны астыннарар. Кинигэни билиһиннэрии ахсынньы 6 күнүгэр куоракка Арчы дьиэтигэр үрдүк таһымнаахтык ыытыллыбыта. Ол туһунан «Дьулурҕан» хаһыат эрэдээктэрэ Петр Павлов сырдаппыта.
Аны бу ааспыт нэдиэлэҕэ Дьокуускайга физкултуура, успуорт үлэһиттэрин III сийиэһэ ыытыллыбыта. Үс күннээх сийиэс бүтэһик тэрээһининэн үгэс быһыытынан сыл аайы ыытыллар «Чөмпүйүөннэр баалларыгар» Петр Петрович доруобуйаларынан хааччахтаах спортсменнар, тренердэр ортолоругар 10 бастыҥ иһигэр ааттанна. Олоҕун аргыһа оҥостубут дуобатыгар кыайыы өрөгөйүттэн тирэхтэнэн салгыы үрдүк чыпчааллары дабайарыгар баҕарабын.
Елена Сыроватская, уопсас. кэрэсп.