Аныгылыы истииллээх дьэрэкээн былааччыйалар, оҕуруоттан тиһиллибит кэрэ симэхтэр, дьиэ киэргэллэрэ улуус историятын түмэлин дьоҕус саалатын симииллэр. Бу Мүрү нэһилиэгин олохтооҕо, иистэнньэҥ, Үһүс саас оскуолатын волонтер-педагога Валентина Захаровна Лукина илиитин сылааһынан айан-тутан, тигэн таһаарбыт оҥоһуктара анал быыстапка буолан тураллар.
Валентина Лукина иистэнэрин ис сүрэҕиттэн сөбүлүүр. 1984 сыллаахха Төнүлүтээҕи СПТУ-ну бүтэрэн кэлэн, оройуоннааҕы быткомбинакка «Эркээйи» биригээдэҕэ үлэлиэҕиттэн илиитин араарбакка иистэнэр, олох хаамыытынан сайдан иһэр талааннаах киһи.
«Үһүс саас оскуолатыгар 2014 сыллаахха киирбитим. Бастаан кыбытык тигиини миэхэ улуус, өрөспүүбүлүкэ норуотун маастара Мария Семеновна Атласова үөрэппитэ. Олус умсугутар эбит дии санаан, кыбытык тигии куруһуогар сылдьан барбытым. Салайааччыбыт улуус норуотун маастара Галина Семёновна үөрэппитэ. Бу сылдьан улуус уонна өрөспүүбүлүкэ күрэхтэригэр кыттар этибит. Аны бэйэбин волонтер-учуутал буол диэннэр, дьону үөрэтээччи буоллум. «Очумелые ручки» диэн куруһуогу салайан үлэлэтэбин. Элбэх үөрэнээччилэнним. Хортуонтан маллаах иһит оҥорорго, ыаҕайаны, олбохтору араас киэргэллэри оҥорорго үөрэтэбин. Үһүс саас оскуолата аһыллан, дьиэҕэ олорор дьон үгүс билиини ыланнар, бэйэлэрэ сатыыллара үксээтэ, атыыга да таһаарар буоллулар. Онтон биһиги ис сүрэхпититтэн үөрэбит», – диэн санаатын үллэстэр.
Валентина Захаровна 1982 сыллаахха оскуоланы бүтэрбиттэр өрөспүүбүлүкэтээҕи куонкурустарыгар кыттан 2022 сыллаахха Гран-при үрдүк аатын ылбыта. Доруобуйаларынан хааччахтаах дьон өрөспүүбүлүкэтээҕи, улуустааҕы күөн-күрэстэрин актыыбынай кыттыылааҕа. Оҕуруонан оҥоһуктар өрөспүүбүлүкэтээҕи куонкурустарын биири да көтүппэт. Кэтэхтэн араас курэхтэргэ кыттан 1-кы, 2-с истиэпэннээх үрдэли ылары ситиһэн үөрүүтэ муҥура суох. 2019 сыллаахха ыытыллыбыт Туймаада ыһыаҕар “Сылааһынан угуттуур олбох” куонкурска коллективынан бастыыры ситиспиттэрэ.
Пандемия да кэмигэр дьиэҕэ хаайтаран олорон, бэйэтин үөрүйэҕэр дьону үөрэппитэ махталынан угуттанар. Тааттаҕа, Мэҥэ Хаҥалас Павловскайыгар маастар-кылаастары ыыппыта. Куйаар ситимин нөҥүө Намтан, Дьокууйскайтан, Тааттаттан эмиэ үгүс киһи үөрэммитэ. Балыыһаҕа эмтэнэ да сыттар, быраастары, сиэстэрэлэри оҕуруону тиһэргэ үөрэтэрэ. Ити курдук сөбүлүүр дьарыгыттан илиитин араарбакка, күн солото суох сылдьар бэриниилээх иистэнньэҥ Валентина Лукина быыстапката киһи хараҕын үөрдэр кэрэ көстүү.
Ольга Шепелева