Кустук өҥүнэн симэммит былыттар, хаарынан сууламмыт отон, күнү кытта тэҥҥэ утуйар ньээм от, сири-дойдуну араҥаччылыыр кынат-былыттар, маска кытта ыттыбыт отоннор, о.д.а. киһи хараҕын сымнатар, сөхтөрөр улууспут кэрэ айылҕатын дьүһүйүүлэрэ Бороҕоҥҥо В.В. Никифоров аатынан «Тойон Мүрү» култуура дыбарыаһын дьоҕус саалатыгар быыстапка буолан кэккэлии турбуттарын сэргии-сэҥээрэ көрдүбүт.
Бу – 2022 сыллаахха «Тойон Мүрү» култуура дьиэтин иһинэн эмтээх оту хомуйар, үөрэтэр соруктаах тэриллибит «Чэгиэн» түмсүү кыттыылаахтарын төрөөбүт улууспут айылҕатын кэрэ көстүүтүн, айылҕабыт чочуйан оҥорор умнуллубат түгэннэрин хаартыскаҕа түһэрэн үйэтитэр үтүө дьарыктарын түмүгэ.
Түмсүү салайааччыта хаартыскаҕа олус кэрэ түгэннэри таба тайанан түһэрэр дьоҕурдаах Александра Черкашина буолар. Кини салалтатынан биир интэриэстээх сүрүннээн 20 киһи түмсэн, сынньалаҥнарын туһалаахтык атаараллар. Александра Васильевна сорох хаартыскалара тугу эрэ бэлиэтииллэригэр, сэрэтэллэригэр итэҕэйэр. Холобур, сири-дойдуну араҥаччылыыр кынат-былыттар халлааҥҥа көстүбүттэрин кини хаартыскаҕа түһэрбитэ. Бу кэнниттэн улууска 2021 сыллаахха улахан хоромньулаах баһаардар буолбуттара. Анал байыаннай дьайыыга ыҥырыы кэмигэр халлааҥҥа “Z” буукубаны таба көрөн эмиэ түһэрэн ылбыта. Ити курдук кини хаартыскалара ураты тыыннаахтар.
Түмсүү биир эдэр кыттыылааҕа түөрт уол оҕо ийэтэ, экономист идэлээх Сардаана Босикова (Бережнева) “Чэгиэн” түмсүү арыллыаҕыттан сылдьар. Биир интэриэстээх дьону кытта алтыһарыттан олуһун сөбүлүүр. Айылҕа көстүүтүн эмиэ уратытык көрөн түһэрэр талааннаах эбит. Айылҕаҕа сылдьалларын, сэрээккэлииллэрин таһынан, муҥхаҕа сылдьыбыттарын, Таатта улууһугар П.А. Ойуунускай төрөөбүт алааһыгар музейга бара сылдьыбыттарын олус күндүтүк саныыр. Бу быыстапкаҕа кини 30-тан тахса хаартыската турда.
Хаартыскалары тэҥэ айылҕа матырыйааллара эмиэ туруоруллубуттар. Кэлбит ыалдьыттары дьэдьэн, хаптаҕас, сугун, боҕуруускай, кучу от уонна да атын оттор утахтарынан күндүлээбиттэрэ быыстапка арыллыытын ситэрэн-хоторон биэрдэ.
Түмсүү чилиэннэрэ бу үлэлэрин аҥардас телефон, фотоаппарат өйүгэр эрэ суулаан сытыарбакка, киэҥ эйгэҕэ билиһиннэрэр, улаҕата биллибэт ураты, кэрэ көстүүнү дьон дьүүлүгэр таһаарбыт быыстапкалара сэтинньи 11 күнүгэр диэри туран, үгүс сэҥээриини ылара саарбахтаммат.
Ольга Шепелева