Бу күннэргэ киэн туттар биир дойдулаахпыт, анал байыаннай дьайыыларга хорсун быһыыны көрдөрөн, бойобуой доҕотторун быыһыы сылдьан сырдык тыына быстыбыт Василий Данилов хорсун аатын үйэтитэр өйдөбүнньүк кинигэ Москва куораттан бэчээттэнэн кэллэ. “Кинигэ 3000 ахсаанынан таҕыста, мантан 500 кинигэ оскуолаларга, өссө 500 муниципальнай тэрилтэлэргэ тарҕаныа. Онтон ордуга кинигэ маҕаһыыннарыгар атыыга тахсыаҕа”, – диэн Василий Данилов кэргэнэ Нарыйаана Данилова иһитиннэрдэ. Хорсун буойун аатын үйэтитэр кинигэ тахсыытын бэлиэтээһин сэтинньи 23 күнүгэр Дьокуускайга ыытыллара былааннанар.
Кинигэ туһунан сиһилии Василий кэргэнэ Нарыйаана Данилова биир дойдулаахтарыгар анаан бу курдук билиһиннэрдэ: “Василий бу күн сириттэн барбытын кэннэ “кини көмөтүнэн тыыннаах хаалбыппыт” диэн СВО-ҕа бииргэ сылдьыбыт, сулууспалаабыт доҕотторо, элбэх киһи эппитэ. Ол кэнниттэн кэргэним сулууспалаабыт байыаннай чааһыттан Россия Дьоруойа аатын иҥэриини туруорсар үлэ саҕаламмыта. Ол саҕана кэргэним, аҕабыт туһунан элбэҕи билбиппит. Кини бу хорсун быһыытынан 50-ча киһини быыһаабыт. Онон кини аата ааттаныахтаах, “суруллубут – суоруллубат” диэн быйыл саас кинигэ таһаарарга санаммыппыт.
Манна судаарыстыбаннай сакааһынан “Айар” кинигэ кыһата үлэлэһэн барбыта. Кинигэбитин Василий бииргэ сулууспалаабыт доҕотторо уонна бүтүн Россия дьоно-сэргэтэ ааҕыахтара диэммит, нууччалыы тылынан таһаардыбыт. Тоҕо диэтэргит, биһиги 10 сыл Хабаровскай куоракка олорбуппут, нуучча тыллаах үгүс доҕордоохпут уонна аймахтаахпыт.
Кинигэ ааптара – Россия суруйааччыларын, суруналыыстарын сойуустарын чилиэнэ, СӨ култууратын үтүөлээх үлэһитэ Сергей Москвитин. Кини бэйэтэ Новосибирскай куоракка олорор. Быйыл саас иккиэн ахтыы хомуйан саҕалаабыппыт. Олус элбэх киһи ахтыы биэрдэ. Ахтыы хомуйар ыарахаттардааҕын эрдэттэн билэр этибит, ол гынан баран Вася туһунан дьон наһаа истиҥник саныыр эбит, бары туох да көрдөһүүтэ суох олус үчүгэйдик ахтыыларын ыыттылар.
Бу кинигэҕэ сэрии эрэ туһунан буолбакка, Вася оҕо сааһа, оскуолатааҕы, студеннаабыт кэмнэрэ, армияҕа сулууспалаабыт сыллара барыта киирдиилэр. Биһиги Васялыын тапталбыт, Хабаровскайга хайдах олорбуппут, көрдөөх да кэмнэрбит, оҕолорбут тустарынан сурулунна. Ол кэннэ 2022 сылга ыарахан кэммит саҕаламмыта бу кинигэҕэ барыта сиһилии кэпсэннэ. Бииргэ сулууспалаабыт уолаттара сэриигэ хайдах сылдьыбыттарын туһунан, Вася бэйэтин хайдах көрдөрбүтүн, дьону быһаабытын туһунан ахтыылара киирдилэр. Васям кылгас да буоллар чаҕылхай олоҕо, курус да, дьоллоох да кэмнэрэ бу кинигэҕэ толору арылынна».
Екатерина Захарова