Дьокуускайдааҕы Медицинскэй колледж Бороҕоннооҕу филиалын устудьуоннара сэтинньи 2-3 күннэригэр Дьокуускайга «Илии сылааһа» диэн сүрэх баҕатынан иистэнэр сыахха көмөлөһөн кэллилэр.
Бу туһунан филиал сэбиэдиссэйэ Любовь Нестерова маннык иһитиннэрдэ:
– Ыҥырыы ыыппыттарын тута ылынан Христина Тютрина, Олеся Бурцева, Нюргуяна Никонова уонна мин төрдүө буолан баран кэллибит. Бу сыахха анал байыаннай дьайыыга барар дьон ис таҥастан саҕалаан кыһыҥҥы таҥастарыгар диэри кэмпилиэк таҥнан барар сирдэрэ баар эбит. Кыргыттар бэлэм киэптэри кырыйыыга, таҥастары наардааһыҥҥа, иистэнэр өттүлэрэ ыстаан тигиитигэр үлэлээтибит.
Сыахха уопуттаах иистэнньэҥнэр да, ис санааларыттан кэлэн көмөлөһөөччүлэр да бааллар эбит. Сарсыардаттан күнү быһа икки күн сылдьан кыахпыт тиийэринэн көмөлөстүбүт. Араас улуустар эмиэ тикпит таҥастарын ыыта тураллар эбит, ону эмиэ хомуйан мөһөөччүккэ уган бэлэмнииллэр эбит. Манна илии-атах буоларга даҕаны көмө олус наада эбит диэн илэ-чахчы көрдүбүт-иһиттибит. Онон, бу дойду туһугар туруулаһа сылдьар дьоммутугар бэйэбит илиибит сылааһын тиэрдэн, сэмэй кылааппытын киллэрэн, үөрэн-астынан кэллибит.
Мария Аргунова