Уус Алданнааҕы ИДьО көҕүлээһининэн, Мүрү 2 №-дээх орто оскуолатын кытары биир сөбүлэҥинэн «Юный друг полиции» диэн улуустааҕы байыаннай-спортивнай хайысхалаах күрэхтэһии сэттис төгүлүн ыытылынна. Үгэс буолбут күрэс 2017 сылтан оҕону патриотическай тыыҥҥа иитэр сыаллаах-соруктаах быйыл алта оскуола үөрэнээччилэрэ кыттыылаах ыытылынна.
Оҕолор сэттэ көрүҥҥэ: Калашников автоматын ыһыыга, хомуйууга, уопсай физическэй туругу тургутууга, 10 миэтэрэттэн салгын саатынан сыалы ытыыга, байыаннай хайысхалаах эстафетаҕа, суол быраабылатын тургутууга уонна канаат тардыһыытыгар илин-кэлин түсүһэн күрэхтэстилэр. Хатыһыылаах күрэх түмүгүнэн үһүс миэстэни 19 очукуолаах Сыырдаах орто оскуолатын оҕолоро ыллылар. Иккис миэстэҕэ 16 очукуолаах Мүрү 2 №-дээх орто оскуолатын үөрэнээччилэрэ тигистилэр. Маҥнайгы миэстэни 13 очукуолаах Мүрүтээҕи уолаттар гимназияларын оҕолоро ылары ситистилэр.
Ону таһынан көрүҥүнэн үрдүк көрдөрүүлээх оҕолор эмиэ бэлиэтэннилэр, сэмэй бэлэҕинэн наҕараадаланнылар. Ол курдук суол быраабылатын тургутугар Мүрү иккис оскуолатын үөрэнээччитэ Настя Бурцева уонна Тумултан Прокопий Алексеев, Калашников автоматын ыһыыга-хомуйууга Мүрү гимназиятын хамаандатын оҕолоро Карина Харитонова уонна Владислав Кузьмин, сыалы ытыыга Мүрү 2 №-дээх оскуолатын үөрэнээччитэ Настя Бурцева уонна Мындааба спортивнай оскуолатын үөрэнээччитэ Айтал Сивцев бэлиэтэннилэр.
Кыайыылаахтар бары өйдөбүнньүк кубогынан, мэтээлинэн, грамотанан, сыаналаах бириистэринэн, сертификатынан наҕаараадаланнылар. Күрэхтэһиини сыл аайы тэрийсэр Мүрү 2№-дээх орто оскуолатын коллективыгар, кыттыыны ылбыт хамаандаларга Уус Алданнааҕы Ис дьыала отделын коллективын ааттыттан махталбытын тиэрдэбит. Сылын ахсын ыытыллар күрэхтэһиибитигэр кыттааччыбыт эбиллэн иһэригэр, киэҥ далааһыннаах буоларыгар баҕарабыт.
Наталья Николаева, Уус Алданнааҕы ИДьО ПДН инспектора, полиция лейтенана