Сэтинньи 17 күнүгэр Россия Ис дьыалаҕа министерствотыгар учаастактааҕы боломуочуйалаахтар сулууспалара тэриллибитэ 100 сыла бэлиэтэнэр. Бу сулууспа үлэһиттэрэ дьоҥҥо-сэргэҕэ, бүтүн нэһилиэнньэҕэ саамай чугас дьон буолаллар. Үгүс бирикээскэ, сокуоҥҥа олоҕуран, ИДьМ сотрудниктарын ортолоругар саамай элбэх үлэлиир бырааптааҕынан биллэллэр. Суол быраабылатыттан саҕалаан ойуур баһаарыгар, ыкка, дьиикэй кыылга тиийэ учаастактааҕы боломуочуйалаах үлэһит көрөн-истэн быһаарыытыгар бэриллэр. Бу улахан бэлиэ даатаны улуустааҕы Ис дьыала отделын учаастактааҕы боломуочуйалаахтара “Дьон үчүгэйгэ тардыһарыттан үөрэбит” диэн эрэх-турах санаалаах көрсөллөр. Буолумуна, кинилэр харахтарын далыгар олох суола күннэтэ субуллар.
Улуус 11 административнай учаастагын көрөр-истэр эппиэттээх үлэһиттэр учаастактааҕы боломуочуйалаахтар буруйу-сэмэни, бэрээдэги хонтуруоллаан утуйар ууларын аахсыбакка түүннэри-күнүстэри үлэлииллэр, туруктаах чөл олох иһин туруулаһаллар. Кинилэринэн киэн туттан туран, ааттарын ааттаан эҕэрдэ бастыҥын тиэрдэбит.
Ол курдук, 1-кы административнай учаастакка, Мүрү нэһилиэгин Бороҕон сэлиэнньэтин арҕаа өттүгэр учаастактааҕы боломуочуйалааҕынан полиция старшай лейтенана Афанасий Афанасьевич Бурнашев үлэлиир. 2-с адм. учаастакка, Бороҕон киин өттүн полиция лейтенана Алена Игоревна Жураховская, 3-с – Бороҕон илин өттүгэр уонна Мындаабаҕа полиция лейтенана Алгыс Петрович Михайлов, 4-с – Чараҥ-Майҕас учаастагар старшай участковай, полиция майора Василий Иванович Егоров, 5-с – Танда, Бээрийэ, Тиит Арыы, Түүлээх эҥэр полиция старшай лейтенана Николай Иннокентьевич Васильев, 6-с – Сыырдаах, Арыылаах, Бэйдиҥэ, Окоемовка, Балаҕаннаах , Уус Күөлэ хайысхаҕа старшай участковай полиция майора Михаил Михайлович Жирков, 7-с – Суотту, Хоноҕор, Тумул, Арыы Тиит учаастагын полиция старшай лейтенана Татьяна Николаевна Харайбатова, 8-с – Кэптэни, Хомустаах, Даалы полиция старшай лейтенана Алексей Гаврильевич Березкин, 9-10-с – Дүпсүн, Чэриктэй, Найахы, Өспөх нэһилиэктэрин полиция капитана Василий Васильевич Сивцев, 11 – Өнөр, II Лөгөй, I Өспөх нэһилиэктэрин полиция прапорщига Николай Валерьевич Михайлов көрөллөр-истэллэр.
Бу састаап үлэтин-хамнаһын сүрүннээччи, учаастактааҕы боломуочуйалаахтар отделениеларын начаалынньыгын эбээһинэһин толорооччу Алексей Березкин бэлиэ күнүнэн урукку кэмҥэ участковайдары салайан олорбут начаалынньыктары, билигин бочуоттаах сынньалаҥҥа олорор, араас эйгэҕэ үлэлии сылдьар бэтэрээннэри Прокопий Тихонович Степановы, Гаврил Лазаревич Портнягины, Андрей Николаевич Петухову, Тарас Алексеевич Гороховы, Марфа Иннокентьевна Щелканованы, Еремей Васильевич Бубякины ахтан-санаан махтал, эҕэрдэ тылларын тиэрдэр. Маны сэргэ үлэлээн ааспыт, үлэлии сылдьар коллегаларыгар эҕэрдэ бастыҥа ананар.
Биллэн турар, сүрүн буруйу-сэмэни оҥоруу арыгыны иһииттэн тахсара чуолкайын тустаах үлэһиттэр бигэргэтэллэр. Ол эрээри, кэнники сылларга нэһилиэнньэ олоҕу көрүүтэ уларыйан, сокуон күүһүрэн, бэрээдэк тупсан эрэриттэн үөрэллэрин биллэрэллэр. Онон чөл олоҕу тутуһуҥ, спордунан дьарыктаныҥ, тигинэччи үлэлээҥ-хамсааҥ, дьиэ кэргэҥҥитин, тулалыыр дьоҥҥутун-сэргэҕитиҥ харыстааҥ диэн баҕа санааларын бастыҥын тиэрдэллэр.
Петр Гоголев, Россия ИДьМ Уус Алдан улууһунааҕы отделын начаалынньыгын солбуйааччы, полиция подполковнига