Участковай диэн бэйэтин үлэлиир быраабын толору баһылаабыт, үөрэхтээх, эт-хаан өттүнэн сайдыылаах, чиэһинэй, эппиэтинэстээх киһи буолуохтаах. Участковай үлэтэ сарсыарда эрдэттэн киэһээ хойукка диэри биир өрөбүлэ суоҕун кэриэтэ. Кини түүннэри-күнүстэри сырыылаах, элбэх кэлиилээх-барыылаах, нэһилиэнньэ олоҕун дьиҥ-чахчы билэн, дьон норуот нус-хас олоҕун толору хааччыйааччы буолар.
Бүгүҥҥү кэпсиир киһибит Россия ИДьМ Уус Алдан оройуонун отделыгар участковайынан үһүс сылын үлэлии сылдьар полиция старшай лейтенана Афанасий Бурнашев буолар. Кини 1990 сыл балаҕан ыйын 26 күнүгэр Уус Алдан оройуонун Мындааба бөһүөлэгэр элбэх оҕолоох Акулина Васильевна уонна Афанасий Николаевич Бурнашевтар дьиэ кэргэннэригэр 5-с оҕонон күн сирин көрбүтэ. Афанасий Афанасьевич 2016 сыл сэтинньититтэн Россия ИДьМ Уус Алдан оройуонун отделыгар сокуоннай саастарын ситэ илик оҕолор подразделенияларыгар инспекторынан үлэтин саҕалаабыта. Күн бүгүн улууспут киинигэр Бороҕоҥҥо участковайдаан, элбэх сыратын-сылбатын, өйүн-санаатын ууран туран үлэлиир. Оҕо сылдьан спордунан утумнаахтык дьарыктаммыт буолан, бу үлэтигэр күн аайы кэриэтэ охсуллар ыарахаттартан иҥнэн-толлон турбат, идэтин толору баһылаабыт киһинэн бэлиэтэнэр.
Ол курдук Афанасий бастакы кылаастан Мындааба спортивнай оскуолатыгар үөрэҕин быыһыгар көҥүл тустуунан сөбүлээн дьарыктаммыта. Сытыы-хотуу уол кыра кылаастартан элбэх көлөһүнүн тоҕон, күүскэ дьарыктанан, нэһилиэк, улуус иһигэр ыытыллар күрэхтэргэ аата сыыйа иһиллэн барбыта.
Бастакы улахан ситиһиилэрэ 2005 сыллаахха кэлбиттэрэ. Ити сыл Уһук Илиҥҥи уокурук уонна Россия оҕолорго чемпионун үрдүк аатын сүкпүтэ. Ол сыл кинини тренердэр бэлиэтии көрөннөр, Олимпийскай эрэллэри бэлэмниир училищеҕа туттарсарыгар сүбэлээбиттэрэ. Кэскиллээх уол бу үөрэх кыһатыгар туттарсан киирэн, 9-с кылааска салгыы үөрэнэн барбыта. 2006-2007 сылларга оҕолор ортолоругар өрөспүүбүлүкэҕэ ыытыллыбыт чемпионаты кыайан, салгыы Уһук Илиҥҥи уокурук оҕолорго спартакиадаларын кыайан, Россия күрэҕэр кыттан 2-с миэстэ буолары ситиспитэ. Ити кэмнэртэн кини Уһук Илиҥҥи уокурук сүүмэрдэммит хамаандатыгар киирэн, Россия оҕолорун икки ардыларыгар ыытыллыбыт сайыҥҥы спартакиадаҕа 2-с бочуоттаах миэстэни ылбыта. Эдэрдэр ортолоругар Украинаҕа уонна Белоруссияҕа ыытыллыбыт норуоттар икки ардыларынааҕы күрэхтэри утуу-субуу кыайбыта. Эмиэ ити сыл Россияҕа кадеттар ортолоругар 3 миэстэни ылары ситиспитэ. 2009 сыллаахха Улан-Удэ куоракка ыытыллыбыт Россия чемпионатыгар эдэрдэр ортолоругар 2-с миэстэ буолан, Европа чемпионатыгар кыттар быраабы ылбыта. Ити кэнниттэн Россияҕа улахан дьон ортотугар хас даҕаны турнирга кыайыылаах буолбута. Түбүктээх үлэтэ сыаналанан, 2010 сыллаахха көҥүл тустууга Россия спордун маастара үрдүк ааты сүгэри сүкпүтэ.
2016 сыл хапсаҕайдаһан тустууга республика чемпионатын призера, хапсаҕайга Ис дьыала министиэристибэтин чемпиона буолан, хапсаҕайга Саха Өрөспүүбүлүкэтин спордун маастара нуорматын толорбута. Кини спортка саамай улахан ситиһиитинэн 2019 сыллаахха Кытайга Ченду куоракка силовой структура үлэһиттэрин ортолоругар ыытыллыбыт аан дойду чемпионатыгар Россия хамаандатыттан кыттан, көҥүл тустууга 57 киилэҕэ бастаабыта буолар. Дойдутугар бу ситиһиитинэн үрдүктүк чиэстэммитэ, Мүрү нэһилиэгин уонна Уус Алдан оройуонун социальнай-экономическай кылаатын иһин бэлиэлэринэн наҕараадаламмыта.
Афанасий билигин Россия Ис дьыалаҕа министерствотын Уһук Илиҥҥи юридическай институт 5-с курсугар кэтэхтэн үөрэнэ сылдьар, Бороҕон сэлиэнньэтигэр участковайынан үтүө суобастаахтык үлэлиир. Кэргэнэ Ольга Михайловна Уус Алдан кииннэммит балыыһатыгар акушерскай отделениеҕа медсестранан үлэлиир. Эдэр ыал үс оҕолоохтор, дьиэ-уот туттан ньир-бааччы олороллор.
Эдэр үлэһит Афанасий Бурнашев эппиэтинэстээх үлэтигэр ситиһиилэри баҕарабыт.
Ольга Шепелева