Мүрү нэһилиэгин Мындааба орто оскуолатын (дириэктэр Николай Готовцев) үөрүүлээх линейката үөрэнээччилэр парааттарынан саҕаланна. Уопсайа 140 оҕо саҥа үөрэх дьылын саҕалаата.
Ураты долгутуулаах түгэн оскуола боруогун саҥа атыллаан киирбит 5 кырачааҥҥа уонна кинилэр төрөппүттэригэр буолла. Төрөппүттэр икки кыыһы уонна үс уолу сиэтэн киллэрэн, иккис ийэ кэриэтэ буолуохтаах маҥнайгы учууталларыгар Алена Аржаковаҕа туттардылар. Мантан салгыы оҕо саадыттан кынаттанан тахсыбыт кырачааннарга саҥа аартыктар арыллан, билии-көрүү үктэллэрин дабайан иһиэхтэрэ.
Номнуо оскуола үөрэнээччитэ ааты сүгэр оҕолорбутун улуус, нэһилиэк, үөрэх управлениетын уонна оскуола коллективын аатыттан үгүс эҕэрдэ тыллара этилиннилэр, бэлэхтэр туттарылыннылар. Итиэннэ үгэс быһыытынан кинилэри убайдара, эдьиийдэрэ – 11 кылаас үөрэнээччилэрэ эҕэрдэлээтилэр, бэлэхтэрин тутардылар.
Билии күнүн маҥнайгы чуораанын бастакы кылаас үөрэнээччитэ Ева Неустроева уонна 11 кылаас үөрэнээччитэ, спортсмен, актыбыыс Артем Пегов тыаһаттылар.
Оттон сырдыкка-кэрэҕэ угуйар, үөрэххэ-билиигэ уһуйар аналлаах 21 педагог, бу иһигэр быйылгы үөрэх дьылыгар үөрэҕин саҥа бүтэрэн кэлбит физкултуура учуутала Евдокия Рожина үлэлэрин саҕалаатылар. мындааба орто оскуолатын коллективыгар, үөрэнээччилэригэр ситиһиилээх үөрэх дьылын баҕарабыт.
Ольга Шепелева