Сааһырбыттар декадаларынан Лөгөй нэһилиэгин Кэптэни, Даалы, Хомустаах бөһүөлэктэрин ытык-мааны аҕам саастаахтарыгар анаан Бүөтүр Оҕотоойоп аатынан сынньалаҥ киинин үлэһиттэрэ бэртээхэй киэһэни бэлэхтээтилэр.
Баһылык солбуйааччыта Владимир Петров үөрүүлээх быһыыга-майгыга «Саха Республикатын бочуоттаах кырдьаҕаһа» түөскэ анньыллар бэлиэни Земфира Никифороваҕа, Николай Алексеевка, Петр Пуховка, Галина Олесоваҕа, Иван Копыриҥҥа туттарда, маны таһынан Николай Алексеевка «Лөгөй махтала» бэлиэ ананна.
Наҕараадаламмыттарга уонна биэчэр кыттыылаахтарыгар «Чэчир» уһуйаан иитиллээччилэрэ Филипп Сокорутов, Сулустаан Хабаров (сал. Альбина Бурнашева), Лөгөйдөөҕү лицей-интернат үөрэнээччитэ Дамир Прядезников ырыанан эҕэрдэлэрин тиэртилэр уонна учуутал Анастасия Колесова салататынан оскуола оҕолоро ис сүрэхтэриттэн кыһаллан оҥорбут букеттарын туттардылар.
Онтон салгыы биэчэр күрэстэрэ бэрт сэргэхтик аастылар. Онно «Эбэм минньигэс аһа» диэн оҕуруот аһыттан кыраһыабай көстүүлээх, минньигэс бүлүүдэлэрин эйэҕэс эбэлэр мустубут дьоҥҥо кэпсээн бэйэлэрин кистэлэҥнэрин үллэһиннилэр. Бу күрэскэ ыайыылаахтарынан Анастасия Никифорова, Акулина Колесова, Зоя Бурнашева ааттаннылар. Айылҕа матырыйаалыттан «Күһүҥҥү айылҕабыт» тиэмэҕэ панно күрэһигэр Мария Татаринова, Аксинья, Мария Андросова бэлиэтэннилэр уонна «Бэлэм буол» бэйэ тигии бэриэнньик күрэһигэр Мария Андросова, Александра Гоголева, Анна Фомина-Ксенофонтова оҥоһуктара бастыҥынан ааттанна.
Ытык дьоммут дэлэй астаах сандалы тула олорон үөрэ-көтө, кэпсэтэн-ипсэтэн бары да сэргэхсийэн тарҕастылар.
Екатерина Мигалкина, уопсас. кэрэсп.