Кэптэнигэ Саха Өрөспүүбүлүкэтин Бырабыыталыстыбатын отчуотун кэмигэр олохтоохтор маннык мунньахтарга туруорсан ситиспит тутуулара олоххо киирэрин туоһутунан саҥа спортивнай саала бырайыагын-сметатын докумуонун быйыл бүтэрэр туһунан дуогабарга Лөгөй нэһилиэгин баһылыга Николай Попов уонна Уус Алдан улууһун баһылыга Василий Аммосов илии баттастылар.
Отчуот сүнньүнэн дакылаат кэнниттэн олохтоохтор араас кыһалҕалаах даҕаны, инники сайдыыны түстүүр боппуруостары хото туруорустулар, бэйэлэрин санааларын, этиилэрин киллэрдилэр. Ол курдук чааһынай дьиэлэргэ киинтэн ититиини киллэрии, детсадка, интернакка саҥа дьиэлэри тутуу, Хомустаахха сынньалаҥ киинин 1958 сыллааҕы тутуу дьиэтин оннугар эмиэ саҥа дьиэ тутулларыгар, тыа хаһаайыстыбатын салаатыгар ханнык граннарга дьиҥ-чахчы үлэлэһиэххэ сөбүн, олохтоох арыы сыаҕын сөргүтэн атын хайысханан үлэлэтэри, оҕолору үлэнэн иитиини сөргүтэргэ, музей дьиэтин тутуу, Эрбэһиҥҥэ баар Күүстээх Уйбаан бэйэтэ туппут историческай балаҕанын сөргүтэргэ санааларын эттилэр, араас таһымнаах тутууларбытыгар бырайыактарга киирсэрбитигэр күүс-көмө, сүбэ буолуҥ диэн көрдөстүлэр.
Мунньах үөрүүлээх чааһыгар СӨ Бырабыыталыстыбатын бэрэссэдээтэлин солбуйааччы Сергей Местников Лөгөй орто оскуолата «лицей-интернат» статустаммытынан эҕэрдэлээтэ. Бу оскуола коллектива, үөрэнээччилэрэ сылтан сыл үлэҕэ, үөрэххэ үрдүк ситиһиилэринэн кэлбитин, ону 2022–2023 үө.дь. түмүгүнэн Лөгөй орто оскуолата өрөспүүбүлүкэҕэ 13-с миэстэ буолбута туоһулуурун бэлиэтээтэ.
Итини таһынан нэһилиэк бастыҥ үлэһиттэрэ бырабыыталыстыба наҕараадаларын туттулар.
Екатерина Мигалкина, уопсас. кэрэсп.