Бүгүн Уус Алданнааҕы территориальнай быыбар хамыыһыйата күһүҥҥү быыбар түмүгүнэн бастыҥнары бэлиэтиир тэрээһини ыытта.
Хамыыһыйа бэрэссэдээтэлэ Иннокентий Сергеев быйылгы быыбар уратылааҕын, ол курдук үс түһүмэхтээҕин: Ил Дархан, Ил Түмэн уонна улуус таһымнаах буолбутун бэлиэтээтэ. Быыбар сорох түһүмэхтэригэр бэрт тыҥааһыннаахтык барбытын, онно быыбардыыр хамыыһыйалар олус болҕомтолоохтук, бары ирдэбили тутуһан үлэлээбиттэригэр махталын биллэрдэ.
Оттон быыбарга кыттыы эмиэ көхтөөх буолбутун эттэ. Улуус быыбардааччытын 68% кыттан өрөспүүбүлүкэҕэ биир үрдүк көрдөрүү буолара ахтылынна. Түмүгэр быйыл өссө икки нэһилиэккэ баһылыктарын уонна кэлэр сылга Россия бэрэсидьиэнин быыбардара баалларынан, онно эмиэ таһаарыылаах үлэни ыыталларыгар баҕарда.
Тэрээһиҥҥэ улуус дьокутааттарын Сэбиэтин бэрэссэдээтэлэ Иннокентий Аммосов уонна улуус баһылыгын солбуйааччы Анатолий Сторожев кыттыыны ыллылар. Кинилэр эмиэ быыбардыыр учаастактар чилиэннэригэр таһаарыылаах үлэлэринэн махталларын, эҕэрдэлэрин тиэртилэр.
Үөрүүлээх тэрээһиҥҥэ быыбардыыр учаастактар бастыҥ үлэлээх чилиэннэригэр наҕараадалар туттарылыннылар. Өрөспүүбүлүкэ киин быыбардыыр хамыыһыйатын үрдүк наҕараадатын анал көмүс бэлиэни Аксиния Бурнашева, Анисим Охлопков туттулар. Итини элбэх киһи улуус баһылыгын, Сэбиэтин бэрэссэдээтэлин, быыбардыыр хамыыһыйатын грамоталарынан, махтал суруктарынан наҕараадаланнылар. Тэрээһин кыттыылаахтарыгар ыллам ырыалар ананнылар.
Афанасий Сектяев