Тулунаҕа өрөспүүбүлүкэҕэ Оҕо саас сылынан, Оҕо көмүскэллээх буолуутун күнүн чэрчитинэн уһуйааммыт оҕолоругар Оҕо ыһыаҕа буолан ааста. Сарсыардаттан кырачаан иитиллээччилэрбитин, төрөппүттэрбитин ыһыах ыһар сирбитигэр кымыстаах чороонунан күндүлээн,сиэри-туому тутуһан күөх сайыны уруйдуу көрүстүбүт.
Бөлөхтөр иитээччилэрин,төрөппүттэрин кытта сахалыы таҥнан-симэнэн парааттаан саҕалаатылар. Ыһыах аһыллыытын иитиллээччилэрбит «Үрүҥ тунах ыһыаҕынан» эҕэрдэ кэнсиэринэн киэргэттилэр. Салгыы дьиэ кэргэнинэн «Маанылаах саха таҥаһа», «Кыталык Куо» кыргыттарга авангард көстүүмү көрүү,»Орто дойду олоҥхотун бухатыыра» уол оҕо авангард көстүүмү көрүү, «Саха кыыһын субуллар суһуоҕа» күөн-күрэстэр буоллулар.
Дьиэ кэргэнинэн сахалыы таҥаһы көрүү күрэскэ Мичийээнэ, Сахалина, Людмила, Валерий Троевтар дьиэ кэргэн кыайыылааҕынан буоллулар. Санаайа, Анастасия, Гаврил Шепелёвтар үрдэл иккис таһыма буоллулар. Уһун суһуох күрэһигэр кыайыылаахтарынан Майя Бурнашева, Саша Шепелева ааттаннылар, «Кыталык Куо» күрэс Чыпчаал аатын Лилиана Носова, Мичийээнэ Троева ыллылар, «Орто дойду олоҥхотун бухатыыра» Чыпчаал ааты Захар Тарабукин, Леня Носов ылары ситистилэр. Кыайыылаахтар бары мэктиэ суругунан, бэлэҕинэн бэлиэтэннилэр.
Оһуохай – сахалар сүҥкэн бэлиэбит утума. Оһуохай – ыһыахпыт киэргэлэ. Тулуна орто оскуолатын 5-с кылааһын үөрэнээччитэ Сахалина Троева оһуохай таһааран кэлбит дьону түмтэ.
Күүстээхтэр, быһыйдар күрэхтэһиилэригэр оҕолорбут илин-кэлин түсүһэн ким күүстээҕин быһаарыстылар. Ол курдук мас тардыһыытыгар улахан уолаттар ортолоругар муҥутуур кыайыылааҕынан Аян Дегтярев буолла, Петя Сергеев – 2-с миэстэ, Айхаан Архипов – 3-с миэстэ; кыра уолаттарга Саша Сергеев – 1-кы миэстэ, Леня Носов – 2-с миэстэ; өбүгэлэрбит биир сөбүлүүр күрэхтэһиилэрин көрүҥэр – кыыс эккирэтиигэ бастакынан Петя Сергеев, иккиһинэн Айхаан Архипов, үсүһүнэн Аян Дегтярев эккирэтэн кэллилэр; кыргыттар этэрбэс быраҕыытыгар күрэхтэстилэр, муҥутуур кыайыылааҕынан Майя Бурнашева ааттанна; улахан бөлөх кыргыттарыгар Мичийээнэ Троева – 1-кы миэстэ, Кэрэчээнэ Неустроева – 2-с миэстэ, Алисия Аржакова – 3-с миэстэ; кыра кыргыттар ортолоругар Санаайа Шепелева – 1-кы миэстэ, Лилиана Носова – 2-с миэстэ; сүүрүү көрүҥэр Майя Бурнашева – 1-кы миэстэ, улахан бөлөххө Алисия Аржакова – 1-кы миэстэ, Мичийээнэ Троева – 2-с миэстэ, Кэрэчээнэ Неустроева – 3-с миэстэ, кыра кыргыттарга Санаайа Шепелева – 1-кы миэстэ, Лилиана Носова 2-с миэстэ буоллулар. Кыайыылаахтар бары мэҥэ суругунан, мэтээлинэн, үтэһэлээх этинэн наҕараадаланнылар.
Сахалыы астаах сандалы тула олорон сэһэргэһии мааныта буолла. Үөрэн-көтөн самаан сайыны уруйдаатыбыт, кэнчээри ыччаппыт көрүлээн көччүйдүлэр.
Александра ВАСИЛЬЕВА, бас иитээччи