Бүгүн Баатаҕай нэһилиэгэр бөдөҥ уопсастыбаннай диэйэтэл, өрөспүүбүлүкэҕэ успуордун, физическэй хамсааһыны тэрийээччи Николай Тарскай төрөөбүтэ 100 сылын бэлиэтиир тэрээһиннэри саҕалыыр түһүмэх ыытылынна. Бу күнтэн ыла кини төрөөбүт күнүгэр диэри 100 хонук хаалла диэн халандаар арылынна. Ол аата ыам ыйын 8 күнүгэр диэри.
Тэрээһин нэһилиэк спортсменнарын парадынан саҕаланна. Бу сиртэн элбэх номоххо киирбит күүстээхтэр, чулуу спортсменнар тахсыбыттара. Нэһилиэк баһылыга Михаил Белолюбскай эҕэрдэтин тиэрдэн туран, үбүлүөйдээх сыл тэрээһиннэрин сырдатта. Салгыы уолаттар «Уоланнар» бөлөхтөрө монтаж аахта, эр дьон ансаамбыла «Баатаҕайым киэһэтэ» ырыаны дьиэрэтэ. Тарскай успуорт тэрээһиннэрин акробатикаттан саҕалыыр үгэстээҕэ. Ону кэрэһилээн Баатаҕай оскуолатын оҕолоро акробатика хамсаныыларын көрдөрдүлэр.
Тэрээһин буоларын курдук спортивнай күрэхтэһиинэн түмүктэннэ. Ол курдук тэрилтэлэринэн, түөлбэлэринэн хамаанда туруораннар, барыта аҕыс хамаанда дартска, уксааҥҥа, мүһэ былдьаһыытыгар күрэс былдьастылар.
Чулуу киһи Николай Тарскай сыла Баатаҕай нэһилиэгэр эрэ буолбакка, улууска эмиэ саҕаланна.
Афанасий Сектяев