Милиция майора Варвара Михайловна уонна полиция подполковнига Тарас Алексеевич Гороховтар ыал буолбут олохторун суола Уус Алданнааҕы Ис дьыала отделыгар үлэлии киирбит кэмнэриттэн субуллар, кинилэр иккиэн билигин отставкаҕа олороллор. Улахан эппиэтинэстээх үлэлэрин көрө-билэ, истэ сылдьыбыт уоллара сержант Алексей Горохов төрөппүттэрин утумнаан, аармыйаттан кэлээт да 2021 сыллаахха эмиэ улуустааҕы Ис дьыала отделын сотруднигынан үлэтин саҕалаабыта.
Дьиэ кэргэн ийэтэ Варвара Горохова улуустааҕы Ис дьыала отделыгар 1992 сыл балаҕан ыйын 16 күнүгэр үлэлии киирбитин субу баардыы өйдүүр. Иккистээн да төрөөтөхпүнэ, «бу үлэбин син биир талыам этэ» диэн санаатын үллэстэр:
– Оҕо сылдьан ГАИ-га үлэлиэхпин олус баҕарар этим. Ол баҕа санаабын толорор бастакы үктэлбинэн, Төҥүлүтээҕи СПТУ-га “В”, “С” категориялаах суоппар идэтигэр үөрэммитим буолар. Салгыы Тандаҕа ууну таһар массыынаҕа аҕыйах ый суоппардаабытым. Онтон Благовещенскайдааҕы тыа хаһаайыстыбатын институтун инженер-механик үөрэҕэр барбытым. Үөрэхпин бүтэрээт да, тута дойдубар кэлэн отделга сууттаммыт дьону кытта үлэлэспитим. Салгыы оҕо эрдэҕинээҕи баҕам туолан, ГАИ үлэһитэ буолар үөрүүлэммитим. Үлэлии сылдьан 1996 сыллаахха бииргэ үлэлиир уолбун Тарас Гороховы кытта ыал буолбуппут, оҕо-уруу тэнитэр дьолломмуппут. Онон ГАИ-бар кылгас кэмҥэ да буоллар үлэлээбиппиттэн олус астынабын, истиҥник саныыбын.
Варвара Горохова 2004-2022 сылларга улуустааҕы паспортнай остуол начаалынньыгынан үлэлээбитэ. Кэлин бу үлэ миграционнай сулууспаҕа уларыйан, салгыы начаалынньыктаабыта. Милиция майора званиелаах 2013 сылтан бочуоттаах сынньалаҥар тахсан, билигин государственнай миграционнай сулууспа специалист-эксперэ буолар. Варвара Михайловна СӨ уус-уран оҥоһуктарын, Уус Алдан улууһун норуотун маастара. Улуус култууратын уонна социальнай-экономическай сайдыытыгар кылаатын иһин бэлиэлэр, “Сулууспаҕа туйгунун иһин” III истиэпэннээх мэтээл хаһаайкалара. Саха төрүт үгэһин сайыннаран туос иһити-хомуоһу тигиинэн дьарыктанар. Маны тэҥэ таҥаһы быһыыга (закройщик), таҥас дизайнерыгар анаан үөрэммит талба талааннаах иистэнньэҥ.
Дьиэ кэргэн аҕа баһылыга Тарас Алексеевич улуустааҕы Ис дьыала отделыгар 1995 сыллаахха холуобунай ирдэбилгэ үлэҕэ киирбитэ. 2013 сылга биэнсийэҕэ тахсыар диэри холуобунай ирдэбил начаалынньыгынан үлэлээбитэ. Онон үлэлээбит 18 сылын бүүс-бүтүннүү бу эйгэҕэ анаабыта. Үтүө суобастаах үлэтин бэлиэтээн, 2002 с. “Криминальнай милиция бастыҥ сотруднига” бэлиэнэн, 2005 с. “Туйгун сулууспатын иһин” III истиэпэннээх мэтээлинэн, 2013 сыллаахха “Уус Алдан улууһун социальнай-экономическай сайдыытыгар кылаатын иһин” бэлиэнэн, Россия Дьоруойа Михаил Стрекаловскай аатынан бириэмийэнэн наҕараадаламмыта.
Дьиэ кэргэн тапталын чопчулара Алексей, Александр уонна Алена – үлэ, үөрэх дьоно. Алексей үс сиэни бэлэхтээн, төрөппүттэрэ кырачаан сиэннэри бүөбэйдэһэр дьоллоох дьон. Иккис уол Александр быйыл А.А. Новиков аатынан Санкт-Петербурдааҕы гражданскай авиация государственнай университетын Дьокуускайдааҕы филиалын авиатехник идэлээх бүтэрбитэ уонна ытык иэһин толоро аармыйаҕа сулууспалыы бараары бэлэмнэнэр. Кыралара Алена оскуоланы эмиэ быйыл бүтэрбитэ уонна ХИФУ инфраструктурнай технологиялар колледжтарыгар сибээһи уонна инфокоммуникационнай ситимнэри үөрэтэр идэҕэ 1 куурус устудьуона. Гороховтар иллэҥ кэмнэрэ айылҕаны кытта сибээстээх. Аҕалара Тарас Алексеевич бултуурун, балыктыырын туохтааҕар да ордорор. Онон дьиэ кэргэнин эмиэ бу дьарыгар сыһыаран, оҕолоро кыра эрдэхтэриттэн тэҥҥэ сылдьыһаллар, сир астыыллар.
Улуус олохтоохторун олоҕун араҥаччылыыр ыарахан уонна эппиэтинэстээх үлэ сайдыытыгар кылааттарын киллэрсибит, ону ааһан утуму салҕааччылаах Гороховтар дьиэ кэргэн үлэлээбит кэмнэрин олус истиҥник ахталлар-саныыллар. Биир идэлээхтэригэр, үлэлээн-ааспыт бэтэрээннэргэ бары үтүөнү, доруобуйаны, таһаарыылаах үлэни-хамнаһы, этэҥҥэ буолууну ис сүрэхтэриттэн баҕараллар.
Ольга Шепелева