Хабылык, хаамыска, сүүрүү, дартс, пазлы таҥыы, буулдьанан ытыы курдук көрүҥнэргэ бүгүн улууспут доруобуйаларынан хааччахтаах дьоно бастыҥнары тургуттулар. Ахсынньы 4-14 күннэригэр ыытыллыбыт доруобуйаларынан хааччахтаах дьон декадаларын чэрчитинэн ыытыллар түмүктүүр спартакиадаҕа тоҕус нэһилиэктэн 10 хамаанда түмүстэ.
Спартакиада үөрүүлээх чааһыгар улуустааҕы доруобуйаларынан хааччахтаах дьон (бэрэссэдээтэл Елизавета Васильева), бу иһигэр истибэттэр (бэрэссэдээтэл Ирина Басыгысова), көрбөттөр (бэрэссэдээтэл Дмитрий Аммосов) уопсастыбаларын чилиэттэрин декаданы түмүктүүр тэрээһининэн улуус баһылыгын социальнай боппуруостарга солбуйааччы Анатолий Сторожев эҕэрдэтин тиэртэ:
– Биир дойдулаахпыт Н.Н. Тарскай төрөөбүтэ 100 сылынан сүрдээх элбэх күрэхтэһиилэр, тэрээһиннэр күүтүллэллэр. Онно бары көхтөөхтүк кыттыаххыт. Итиэннэ адаптивнай спорт көрүҥэр анал тренердэнэҥҥит, Надежда Мухина көмөтүнэн бу саалаҕа эрчиллэн, республика үрдүнэн ыытыллар араас күрэхтэһиилэргэ кыттаҥҥыт ситиһиилэр үксүөхтэрэ диэн эрэнэбин, – диэн баҕа санаатын эттэ.
Итиэннэ Баатаҕай нэһилиэгин инбэлииттэрин уопсастыбатын бэрэссэдээтэлигэр Евдокия Гоголеваҕа, Лөгөй нэһилиэгин бэрэссэдээтэлигэр Афанасий Олесовка, Байаҕантай нэһилиэгэр бэрэссэдээтэллээбит Анна Новгородоваҕа, Бэрт Ууһун нэһилиэгин бэрэссэдээтэлигэр Прокопий Колодезниковка махтал суруктары туттарда. Маны сэргэ эҕэрдэлэрин социальнай көмүскэл управлениетын начальнига Елена Кривошапкина, улуус дьаһалтатын спорт отделын начальнига Евгений Алексеев тиэртилэр.
Доруобуйаларынан хааччахтаах дьон улуустааҕы уопсастыбаларын бэрэссэдээтэлэ Елизавета Васильева куруук өйөһөн-өйдөһөн уонна бу декадаҕа бииргэ үлэлэспит дьонугар махтал суруктары туттарда. Үөрүүлээх чаас түмүгэр биир дойдулаахпыт Иннокентий Готовцев эҕэрдэ ырыатыгар барыга көхтөөх дьоммут вальстаан эргийдилэр.
Күрэхтэһии уопсай түмүгүнэн Бэрт Ууһун спортсменнара бастыҥнарынан ааттаннылар уонна кубогынан наҕараадаланнылар. Иккис миэстэ өнөрдөр, үһүс лөгөйдөр буоллулар. Биирдиилээн көрүҥнэр бастыҥнара: хабылык, хаамыска – Курбуһах, булдьанан ытыы – Лөгөй, дартс – Баатаҕай, пазлы таҥыы – II Байаҕантай, 50 м сүүрүү (дьахталлар) – Бороҕон нэһилиэгэ. Биирдиилээн көрүҥнэр бастыҥнара: хабылык, хаамыска – Бэрт Ууһа, буулдьанан ытыы – 2-с Байаҕантай, дартс – Лөгөй, пазлы таҥыы – Өнөр, 50 м сүүрүү (дьахталлар) – Баатаҕай.
Көрсүһүү Саҥа дьылы көрсөр бырааһынньыктааҕы киэһэнэн салҕанна. Манна үөрүү-көтүү көҕүлүттэн тутуллан, эҕэрдэ бастыҥа, араас куонкурустар ыытылыннылар, бастыҥ маскарааттар талылыннылар. Онон барыга көхтөөх улууспут олохтоохторо сэргэх күнү атааран, эһиилги сылга көрсөрдүү үөрэн-көтөн тарҕастылар.
Ольга Шепелева