Билигин массыына элбээн киһи барыта суоппар курдук. Ити эрээри, анал идэлээх суоппардар аҕыйахтар. Оттон аҕаларын утумнаабыттар олох аҕыйах буолуохтара. Ханныгын да иһин идэлээх суоппар диэн олох ураты буоллаҕа. Курбуһахха суоппар Егор Аммосовы – Суоппар Дьөгүөрүскэни билбэт киһи диэн суоҕа буолуо. Этэргэ дылы, күүстээх киһи диэнинэн кэпсээҥҥэ киирбит киһи буоллаҕа. Кини Курбуһах нэһилиэгин бастакы идэлээх суоппара буолар. Дьокуускайга автооскуолаҕа үөрэммитэ.
Айан суола тыргыллыаҕыттан, билиҥҥээҥҥэ диэри Курбуһах суолугар “баҕа бадараанныыр” буоллаҕа. Ол да буоллар, хайдахтаах да ардахха, силбиккэ Дьөгүөрүскэ суолга олорон хаалбыта иһиллибэт этэ. Ол суолу “үктээн”, аны билигин уола Егор айанныы сылдьар. Соҕотох уол буолан, аҕата батыһыннара сылдьан массыынаны “билиһиннэрдэҕэ”. Бастакыта күлүүһү ылан биэрэртэн саҕаланан, сыыйа сыстан бардаҕа.
“Аҕа үөрэтиитэ диэн барыта көрдөрөн, туттаран-хаптаран буоллаҕа. Орто кылааска тиийиибэр кыралаан уруулу да туттарар буолла. Оннук сыстаммын олох ылларан бардым. Аны улахан кылааска тахсыыбар чааһынай массыынабытын эрэнэн биэрэн ыытар буолла. Ол аайы суоппар буолар баҕам күүһүрэн истэҕэ”, – диэн Егор ахтар.
Оскуола кэнниттэн Гоша туох да саарбахтааһына суох Суоттутааҕы ОПТУ-га суоппар идэтин баһылыы киирбитэ. Ону бүтэриэҕиттэн 30-тан тахса сыл устата массыына уруулун “эрийэр”. Кини үөрэҕин бүтэрэр кэмигэр сопхуостар күүрээннээхтик үлэлии олороллоро. Онон үлэһит буолан, бастакы олорбут массыыната “ЗИЛ” үүт таһар массыына этэ.
Уларыйыы кэмнэрэ кэлиэхтэриттэн таксист быһыытынан үлэлээн нэһилиэгин дьонун-сэргэтин абырыыр. Биир дойдулаахтара Егоры көрсүө, сымнаҕас майгылааҕын иһин кини туһунан олус истиҥник кэпсииллэр. Аны кини маршрута Бороҕоҥҥо буолбакка, Дьокуускайга айанныыр. Онон куруутун сылдьар массыыналаах буоланнар, курбуһахтар куоракка барарга-кэлэргэ хаайтарыы диэни улаханнык билбэттэр диэххэ сөп. Хата баппакка хаалбыттар баар буолуохтара.
Суоппар Дьөгүөрүскэ туһунан Иосиф Портнягин оройуон хаһыатыгар “Көлүөһэ үрдүгэр олох” диэн ыстатыйа суруйбут эбит. Ол тэҥэ, аны билигин уолун Егор олоҕо онно майгынныыр эбит. Нэдиэлэ үс күнүгэр Егор Аммосов массыыната хайаан да Дьокуускай диэки айанныыр. Ол баран иһэн аара суолга моһуогурбуттарга хайаан да тохтоон өрүү көмөлөһөрүн туһунан элбэхтик истэбин. Егор дьон туһугар үлэтэ “СӨ автомобильнай транспорын Бочуоттаах үлэһитэ” бэлиэнэн сыаналаммыта. Онон кини суоппар аҕатын чахчы дьоһуннук утумнаабыт киһи.
Афанасий Сектяев