Ыам ыйын 7 күнүгэр Суотту нэһилиэгэр С.С. Васильев – Борогонскай аатынан сүрүн оскуолаҕа ытык сирбит Кыһыл Кырдал аатын-суолун үйэтитэр «Ытык сир – Кыһыл Кырдал» кинигэни сүрэхтиир дьоро тэрээһин буолан ааста.
Кинигэҕэ Кыһыл Кырдалга Аҕа дойду Улуу сэриитин кэмигэр фроҥҥа барааччылары түмэн, байыаннай үөрэххэ бэлэмнээн уоттаах сэриигэ атаарбыттарын туһунан докумуоннар, бу кэмҥэ үлэлээбит, алтыспыт дьон ахтыылара, кэпсээннэрэ киирбиттэр. Эмиэ ити кэмҥэ 1943 сыллаахха Суоттуга сэрии тулаайах оҕолорун дьиэтэ тэриллэн, оччотооҕу ыар кэмҥэ элбэх оҕону өрүһүйбүтүн билиһиннэрэр.
Аҕыс түһүмэхтэн турар кинигэни Суотту библиотекатын сэбиэдиссэйэ Раиса Черкашина, Хоноҕор нэһилиэгин библиотекара Ирина Осипова хомуйан оҥордулар. Кинигэ редактора – С.С. Васильев-Борогонскай аатынан улуустааҕы киин библиотека «Алгыс» кыраайы үөрэтэр салаатын сэбиэдиссэйэ Ольга Павлова. Кинигэ версткатыгар «Мүрү саһарҕата» хаһыат шеф-редактора Диана Седалищева уонна техническэй редактор Сардана Бурнашева үлэлэстилэр, корректуратын Диана Седалищева, Светлана Сивцева, Оксана Жиркова оҥордулар, дизайнын Гаврил Попов оҥордо. Кинигэ Дьокуускайга «Дани-Алмас» кинигэ кыһатыгар 260 ахсаанынан бэчээттэнэн таҕыста.
Үөрүүлээх киэһэҕэ улуус баһылыга Василий Алексеев, культура управлениетын начаалынньыга Эльза Киренская, методическай салаа сэбиэдиссэйэ Марианна Бережнева, методист Анна Лугинова, үөрэх управлениетын начаалынньыгын солбуйааччы Иван Никонов, А.Р. Халдеева аатынан Бороҕон нэһилиэгин библиотекатын сэбиэдиссэйэ Светлана Прудецкая, Суотту нэһилиэгин баһылыга Василий Баишев, нэһилиэк олохтоохторо, бэтэрээннэрэ, Хоноҕор оскуолатын үөрэнээччилэрэ кытыннылар. Ыалдьыттар кинигэ урукку өттүгэр сырдатыллыбатах улууспут Аҕа дойду сэриитигэр кыттыытын кэрчик кэмин үйэтитиигэ улахан суолтатын бэлиэтээтилэр, кэлэр кэнчээри ыччакка оччотооҕу кэм ыар сылларын саната туруо диэн санааларын үллэһиннилэр, итиэннэ бу улахан үлэҕэ кыттыбыт дьоҥҥо махталларын тиэртилэр. Мустубут дьон сэрии кэмин оҕолоро, Хоноҕор оскуолатыгар 1940-с сс. үөрэммит, «Ытык сир – Кыһыл Кырдал» кинигэни аан бастакынан аахпыт Елена Дьяконова уонна педагогическай үлэ бэтэрээнэ Татьяна Пак ахтыыларын долгуйа иһиттилэр.
Кинигэ ырытыытын Раиса Черкашина оҥордо. Бу үлэҕэ улуустааҕы кииннэммит библиотека тиһигин библиотекардара сүҥкэн улахан кылааты киллэрбиттэрин тоһоҕолоон бэлиэтээтэ. Кинигэ сүрэхтэниитин Филипп Габышев, «Көмүөл» эр дьон ансаамбыла тупсаҕай ырыаларынан киэргэттилэр.
Улуу Кыайыы 81-с сылын көрсө күн сирин көрбүт Аҕа дойду Улуу сэриитин сылларыгар Уус Алдан улууһун историятын умнуллубат кэрдиис кэмин сырдатар кинигэ үйэлэргэ умнуллубат өйдөбүнньүк буола туруохтун!
Феврония Федорова, С.С. Борогонскай аатынан киин библиотека метод.салаатын сэбиэдиссэйэ