Улуустааҕы үөрэх управлениетыгар 1981-2004 сс. иниспиэктэринэн, физмат үөрэхтээһиҥҥэ, инновационнай хайысхаҕа мэтэдьииһинэн, 2004 сылтан В.Н. Мигалкин аатынан Чараҥ орто оскуолатын дириэктэрин научнай-мэтэдьиичэскэй үлэҕэ солбуйааччынан үлэлээбит Дарамаева Софья Николаевна төрөөбүтэ 75 сылынан Чараҥ орто оскуолатын кэлэктиибэ «Киэн тутта, махтана саныыр киһибит…» ахтыылартан таҥыллыбыт кинигэни VI улуустааҕы метатурниры көрсө оскуола дьоҕус типографиятыгар бэчээттээн таһаарда.
Кинигэни тэрээһиҥҥэ кэлбит Софья Николаевнаны кытта алтыһан ааспыт, бииргэ үлэлээбит дьонугар бэлэх быһыытынан утары ууннулар. Кинигэ үөрэнээччи Аня Соркомова оскуолаҕа үөрэнэ сылдьан суруйбут «Киэн тутта махтана саныыбыт» диэн төбөлөөх Софья Николаевна үлэтин арыйар дакылаатынан (сал.Л.В. Мигалкина) саҕаланар. РСФСР норуотун үөрэҕириитин туйгуна, «Учууталлар учууталлара» анал бэлиэ хаһаайына, «Барҕарыы» национальнай фонда стипендиата, 1 Хоро нэһилиэгин бочуоттаах олохтооҕо, Педагогическай энциклопедия 3-с томугар киирбит учуутал, салайааччы, ийэ, дьүөгэ С.Н. Дарамаева үлэтин, олоҕун, киҺи быһыытынан ураты кэрэ өрүттэрин сырдатар ахтыылар киирбиттэр. Софья Николаевна олорон ааспыт чаҕылхай олоҕун сэһэргиир хаартыскалар кинигэни байытан, кэҥэтэн биэрэллэр. Кинигэ түмүгэр 2017 сылтан саҕалаан оскуолаҕа ыытыллыбыт улуустааҕы, регионнааҕы «Үөрэх калейдоскоба» метатурнирдар көрүҥнэринэн кыайыылаахтарын ааттара киирбитэ кэрэхсэбиллээх.
Быйылгы VI-с метатурниры оскуола кэлэктиибэ (дириэктэр Н.Г. Бурцев), Софья Николаевна кыргыттара Лена, Катерина Анатольевналар, аймахтара кыттыһан, дьоһуннук бэлэмнэнэн, тэрээһиннээхтик ыыттылар. Биэс көрүҥүнэн ыытыллыбыт күрэхтэр кыайыылаахтара уонна биһирэбил миэстэлээхтэрэ диплому, анал мэтээли, харчынан бириэмийэни туттулар. Метатурнир балаһыанньатынан олохтоммут көһө сылдьар Куубагы бэлэмнээх кэлбит Мындааба орто оскуолатын хамаандата ылла, 10 тыһыынча сууммалаах харчынан бириэмийэни тутта.
Үтүө киһи аата дьон өйүгэр-санаатыгар хаалара, махталынан эрэ ахтыллара бу тэрээһиҥҥэ көһүннэ.
Елена Сыроватская, уопсас. кэрэсп.