Окоемовка бөһүөлэгэ спортивнай бөһүөлэк буолара биллэр. Өссө 1972 сыллаахха ыаллыы олорор Арыылаах бөһүөлэгин кытта шефтэһэннэр, спорт араас көрүҥнэригэр күрэхтэһэн кэлбиттэрэ. Онтон 2012 сыллаахха бу күрэхтэһиилэригэр Мэҥэ Хаҥалас улууһун Матта бөһүөлэгэ кыттыспыта. Силигин ситэрэн 2017 сыллаахха Чурапчы Бахсыта эбиллибитэ. Онон 2017 сылтан түөрт бөһүөлэк дьоно-сэргэтэ, ыччата спорт араас көрүҥнэригэр күрэхтэһэн кэллилэр.
Бу күрэхтэһии сыалынан бэйэ төрүт сирдэригэр ыччаты тардыы, ханна да олордоллор төрүттэрин билэллэрин ситиһии, ыччаты билиһиннэрии буолар. Ыччат сэргэхсийэр, кыаҕын көрдөрөр, кыттааччылар улахан күрэхтэһиигэ дьаныһан бэлэмнэнэллэр. Бөһүөлэктэр түөрт баһылыктара сүбэлэһэн, көрүҥнэрин бэйэлэрэ толкуйдаан, дьоннорун түмэллэр, бэлэмнииллэр.
Күрэхтэһиини дьон сыл аайы олус күүтэллэр. Былырыын биһиэхэ, Окоемовкаҕа, кэлэн күрэхтэспиттэрэ. Быйыл ааспыт өрөбүллэргэ Матта бөһүөлэгэр баран күрэхтэстилэр. Дьиҥинэн, Окоемовка бөһүөлэгэ нэһилиэнньэтин ахсаанынан саамай кыралара, баара-суоҕа 200-чэкэ киһи олорор. Ол да буоллар, куруук инники сылдьаллар.
Быйыл 12-с төгүлүн ыытыллыбыт күрэхтэһиигэ спорт 11 көрүҥэр күрэхтэстилэр. Баһылык Николай Бурнашев ыччатын түмэн, балай да күүстээх хамаанданы илдьэн кытыннарда. Барыта 200 спортсмен, ол иһигэр 20-чэ спорт маастара, кандидаттар, мустан күөн-көрүстүлэр, күрэхтэһии балачча тыҥааһыннаах буолла.
Түмүккэ Мөҥүрүөн нэһилиэгин Матта бөһүөлэгин хамаандата кыайыы өрөгөйүн биллэ. Иккис бириистээх миэстэни Курбуһах нэһилиэгин Окоемовка бөһүөлэгэ ылла, үһүс миэстэҕэ Өлтөх нэһилиэгин Арыылаах бөһүөлэгэ тигистэ, Чурапчы бахсылара төрдүс миэстэ буоллулар.
Мария Аммосова, уопсас. кэрэсп.