Бүгүн улууспут киинигэр өрөспүүбүлүкэ таһымнаах патриотическай форум буолла. Ол чэрчитинэн «Өркөн» оҕону эбии үөрэхтээһин киинигэр «Гражданско-патриотическое воспитание молодежи: технологии, перспективы, сотрудничество» диэн тиэмэҕэ кэпсэттилэр.
Улууспут дьаһалтатын баһылыгын социальнай эйгэҕэ солбуйааччыта Анатолий Сторожев уонна улуустааҕы үөрэх салалтатын начаалынньыгын солбуйааччы Иван Никонов улууспутугар ыччаты патриотическай тыыҥҥа иитэргэ, устуоруйаны харыстыырга туох үлэлэри ыыталларын билиһиннэрдилэр.
Байыаннай дьайыы бэтэрээннэрин түмсүүтүн үлэтин туһунан бойобуой дьайыыга сылдьыбыт бэтэрээннэр Саха сиринээҕи ассоциацияларын бэрэссэдээтэлэ Иван Черкашин кэпсээтэ. Итиэннэ ыччаты патриотическай иитиигэ улуустарын үлэлэрин уопутуттан Томпо, Мэҥэ Хаҥалас улуустарын бэрэстэбиитиллэрэ билиһиннэрдилэр. Ону кытта СӨ социальнай көмүскэл «Победа» ресурснай киин кылаабынай исписэлииһэ Наталья Васильева, СӨ бэтэрээннэр Сэбиэттэрин бочуоттаах бэрэссэдээтэлэ Будимир Слепцов кыттыыны ыллылар. Улууспутугар «Бастыҥнар хамсааһыннарын» туһунан бу тэриллии исписэлииһэ Гаврил Бережнев иһитиннэрдэ.
Форум кыттыылаахтара саалаҕа тэриллибит, дойдубут албан ааттаахтарын туһунан сэһэргиир улууспут коллекционердарын быыстапкатын сэҥээрдилэр.
Мария Аргунова