Партия уобаластааҕы комитетын 1934 сыл сэтинньи 20 күнүнээҕи бюротун “Уус Алдан оройуонунааҕы “Бассабыыктыы тэрийээччи” хаһыатын тэрийэр туһунан” уурааҕынан оройуон хаһыата тахсара быһаарыллыбыта. Ити уурааҕынан редактор Гоголев, типография директора Портнягин, корректордар Шепелев, Слепцов анаммыттара. Редактор Петр Николаевич Гоголевтан уратылара бэл инициаллара суоҕунан кимнээҕин чопчулуур уустук. Арай оччолорго райОНО сэбиэдиссэйинэн үлэлии олорор Федоров Василий Гаврильевич Главлит боломуочунайынан анаммыта эрдэттэн чуолкай биллэрэ.
Биллэрин курдук, хаһыат 1-гы нүөмэрэ 1935 сыл муус устар 4 күнүгэр редактор Петр Николаевич Гоголев илии баттаан 1230 тираһынан күнү көрбүтэ. Хаһыаты идэтийбит полиграфистар И. Давыдов, Степан Петрович Михеев, Мокуянов диэн дьон талан, таҥан бэчээттээн таһаарбыттара биллэрэ.
Редакция уонна типография сайдан испит историяларын, кимнээх редактордарынан, типография сэбиэдиссэйдэринэн, журналистарынан, полиграфистарынан үлэлээбиттэрин үөрэтиигэ, чинчийиигэ, үйэтитиигэ икки уруулуу тэрилтэ үбүлүөйдэрин оруоллара улахан.
Аан бастаан 1975 сыллаахха оройуоннааҕы хаһыат уонна типография тэриллибиттэрэ 40 сыллаах үбүлүөйдэрин редактор Василий Николаевич Титов тэрийэн ыыппыта. Бу үбүлүөй хаһыат төрүттэниэҕиттэн бастакы көлүөнэ активнай селькордар үгүстэрэ баалларына баттаһа, олору кытыннаран, чиэстээн-бочуоттаан ыытыллыбытынан суолтата улахан.
Иккис үбүлүөй 1985 сыллаахха хаһыат тэриллибитэ үйэ аҥаардаах үбүлүөйүгэр анаммыта. Редактор Милан Матвеевич Афанасьев 1984 сыл сэтинньигэ “Кыымҥа” үлэҕэ көспүт, саҥа ананар редактор Юрий Харитонович Смолин Хабаровскайдааҕы Үрдүкү партийнай оскуола журналистикаҕа салаатыгар үөрэнэ сылдьар быыһык кэмҥэ түбэһэн, редакторы солбуйааччы Федор Игнатьевич Васильев салалтатынан тэриллибитэ. Үбүлүөйгэ бэлэмнэнии, тэрийэн ыытыы эппиэтинэһэ, икки коллектив партийнай тэрилтэтин секретарынан үлэлиир буоламмын, партия райкомунан миэхэ сүктэриллибитэ. Үбүлүөй бэс ыйын 1 күнүгэр ананан, болдьообут курдук, Горбачев арыгыны бобор уурааҕынан официальнайа суох чааһыгар ыҥырыллыбыт кырдьаҕастар астымматахтарын сирэйинэн эппэтэхтэрин иһин, сирэйдэригэр-харахтарыгар көстө-биллэ сылдьара. Бу үбүлүөй уонна типография коллективтарын ааспыт историятын үөрэтиигэ, үйэтитиигэ бастакы олугу уурбута. “Ленинскэй тэрийээччи 50 сыла” диэн буклет брошюралыы тигиллибитинэн, төһө да тута кэриэтэ “Полиграфиздатынан” ситэ бэчээттэнэ илик өттө уот аһылыга буолбутун иһин, мин салгыы чинчийэр үлэбин көҕүлээбитэ.
Сэбиэскэй тутул тиһэх сылларыгар 1990 сыллаахха хаһыат уонна типография 55 сыллааҕы үһүс үбүлүөйэ редактор Юрий Харитонович Смолин кэмигэр ыытыллыбыта. Оттон сэбиэскэй кэннинээҕи цензура, бобуу-хаайыы тохтотуллубут кэмнэринээҕи 2000, 2005, 2010, 2015 сыллардааҕы үбүлүөйдэрин республикаҕа аан бастаан икки коллективы түмэн тэриллибит айар-полиграфическай холбоһук генеральнай директор-редактора Аркадий Октябрьевич Алексеев иилээн-саҕалаан, көҕүлээн тэрийбитэ.
1990 сылга хаһыат уонна типография 55 сыллаах үбүлүөйдэрин тэрээһинигэр, 1987 сылтан партия оройуоннааҕы комитетыгар учуот уонна статистика отделын сэбиэдиссэйинэн 1991 сылга диэри үлэлээбит буолан, быһаччы кыттыспатаҕым. Арай “Ленинскэй тэрийээччи” 55 сылынан тахсыбыт кыра кээмэйдээх фото-брошюраҕа суруйааччыларга анабыл күпүлүөттэрим бэчээттэммиттэрэ. Оттон 2000, 2005, 2010, 2015 сыллардааҕы үбүлүөйдэринэн редакция уонна типография коллективтарын историяларын чинчийэр киэҥ ырытыылаах СР Национальнай библиотекатыгар харалла сытар “Бассабыыктыы тэрийээччи” 1 №-тэн саҕалаан 1935 сылтан ыла тигиллибит подшивкалар уонна икки коллектив бирикээстэрин кинигэлэрин матырыйаалларыгар олоҕуран, хаһыат 65 сылынан “Олох, үлэ күүрээнин күөттэспитэ” диэн 10 бэчээтинэй лиис кээмэйдээх бастакы дьоһуннаах кинигэм 500 экземплярынан күнү көрбүтэ. Бу кинигэ республика оройуоннардааҕы хаһыаттарын историяларын үөрэтии бастакы хараҥаччытынан сыаналаммыта. Ити бастакы кинигэбэр хомуйбут архивнай матырыйаалларбар олоҕуран уонна хаһыат кэнники сыллардааҕы кэмин эбэн “Сэттэ уон сыллаах улахан олук” уонна 75 сыллаах үбүлүөйгэ “Саҥа кэм салгына, олох тыына буолан” диэн 26,5 бэчээтинэй лиис кээмэйдээх, иккиэн журнальнай варианынан офсетка бэйэбит типографиябытынан бэчээттэнэн тарҕаммыттара.
Төрдүс “Алгыстаах айар аартык 80 сыла” диэн ааттаах кинигэни хаһыат 80 сылынан 2015 сыллаахха редакторы солбуйааччы Диана Владимировна Седалищеваны кытта бэлэмнээн киэҥ ааҕааччы дьүүлүгэр таһаарбыппыт.
Быйыл муус устар 4 күнүгэр “Бассабыыктыы тэрийээччи” хаһыат уонна оройуоннааҕы типография тэриллибиттэрэ 90 сыла бэлиэтэнэр үбүлүөйдээх дьаһаллара “Мүрү саһарҕата” хаһыат кылаабынай редактора Наталья Гаврильевна Попова салайар коллективынан тэриллэр. Наталья Гаврильевна салайар сылларыгар бастыҥ хаачыстыбалаах, үрдүк полиграфическай таһымнаах улахан кээмэйдээх, халыҥ тастаах кинигэлэри таҥан бэчээттээн таһаарыыга республика инники күөҥҥэ ааҕыллар дьоһун ситиһиилэрдээх. “Сыл бастыҥ хаһыата”, “Печатный двор”, о.д.а. республикатааҕы таһымнаах көрүүлэр кыайыылаахтарын аатыттан түспэт диэтэххэ омуннаан этии буолбат.
Быйылгы 90 сыллаах үбүлүөйүнэн редакция ити инники ааҕыталаабыт кинигэлэри түмэн, биир подарочнай кинигэни таһаарарга үлэлэһэ сылдьар. Онон сибээстээн улуустааҕы архыыпка харалла сытар Уус Алдан оройуонун Ситэриилээх Комитетын 1933-43 сыллардааҕы сессияларын, президиум мунньахтарын, бирикээс кинигэлэрин матырыйаалларын уонна II Лөгөй, Мүрү олохтоох сэбиэттэрин хаһаайыстыбаннай кинигэлэринэн сирдэтэн, ону сэргэ промкомбинат 1940-52 сыллардааҕы бирикээс кинигэлэригэр олоҕуран 1935 сылтан 1980 сылга диэри сүрүннээн типография үлэһиттэринэн кимнээх үлэлээбиттэрин чопчулааһыҥҥа архив үлэһитэ, урукку АПХ ГУ бухгалтера Попова Парасковья Петровна быһаччы көмөтүнэн сааһыланан, саҥа кинигэҕэ “Архыып докумуоннара кэпсииллэр” диэн туспа түһүмэҕинэн итиэннэ сорох дьиҥнээх матырыйааллар ксерокопиялара сыһыарыы быһыытынан киириэхтэрэ.
Иннокентий СЫРОВАТСКАЙ, 1985 сылтан ССРС журналистарын Союһун чилиэнэ, СР бэчээтин туйгуна, СР культуратын үтүөлээх үлэһитэ, журналистикаҕа В.В. Никифоров-Күлүмнүүр аатынан СР Государственнай бириэмийэтин бастакы лауреата, Алексей Шувалов, А.П. Илларионов ааттарынан СР журналистар бириэмийэлэрин лауреата, Россия суруналыыстарын Союһун “Честь. Достоинство. Профессионализм” бочуоттаах бэлиэ уонна “Ытык Сүбэ” бэлиэ хаһаайына, СР бочуоттаан ветерана