Дьиэ кэргэн аан дойдутааҕы күнүгэр анаан бүгүн «Вместе по кругу» диэн физкультурнай-чэбдигирдэр тэрээһиҥҥэ барыта аҕыс дьиэ кэргэн кытынна.
Тэрээһин үөрүүлээх арыллыытыгар Уус Алдан улууһун дьахталларын сүбэтин салайар Евгения Местникова, улуус дьаһалтатын дьиэ кэргэн уонна ыччат политикатыгар салаатын салайааччыта Валентина Андросова, «Россия Ийэлэрэ» хамсааһын улуустааҕы филиалын салайааччыта Ольга Алексеева, “Биир ньыгыл Россия” баартыйа олохтоох салаатыттан дьахталлар хамсааһыннарын салайааччыта Евгения Аргунова, үөрэх салалтатын аатыттан “Оҕо саас сирдьиттэрэ” улуустааҕы координатора Мария Винокурова уонна ылбаҕай ырыанан Айыына Сивцева эҕэрдэлээтилэр.
Тэрээһин кыттыылаахтарыгар Е.Ф. Габышев аатынан Уус Алданнааҕы оҕо спортивнай оскуолатын чэпчэки атлетикаҕа тренерэ Мария Слепцова сэргэх физкультурнай разминканы ыытта, ол кэннэ “Тойон Мүрү” култуура дыбарыаһын балетмейстера Ольга Петрова уонна “Энергия” үҥкүү бөлөҕүн салайааччыта Туяра Ларионова сахалыы үҥкүү хамсаныыларынан күргүөмүнэн флеш-моб тэрийдилэр.
Салгыы тэрээһин күрэһэ саҕаланна. Ол курдук дьиэ кэргэттэр “Змейка на колесах”, “Тихий ход”, “Корнхол”, “Селфи-станция”, “Интеллектуальная семья”, “Финишная фотозона” станцияларынан сорудахтары толордулар. Итиэннэ бу күн туох үтүөнү оҥорбуттарын суруйан, Үтүө санаа маһыгар баайан челленджкэ кытыннылар.
Түмүккэ кыайыылааҕынан Копыриннар ааттаннылар, иккис миэстэни Слепцовтар, үһүс миэстэни Готовцевтар дьиэ кэргэттэрэ ылан мэтээлинэн, сыаналаах бирииһинэн наҕараадаланнылар. Ону тэҥэ станция аайы кыайыылаахтар бэлиэтэннилэр, араас аакка тигистилэр.
Дьиэ кэргэттэр ийэлэрэ күрэһи олус сөбүлээбиттэрин, сэргэхсийбиттэрин эттилэр уонна аныгыскы күрэскэ өссө туох саҥаны киллэриэххэ сөбүн туһунан санааларын үллэһиннилэр, тэрийээччилэргэ махтаннылар.
Бу дьиэ кэргэттэргэ анаммыт бырааһынньыктыы сэргэх тэрээһини Уус Алдан улууһун дьахталларын сүбэтин көҕүлээһининэн тэрилиннэ. «Россия Ийэлэрэ» түмсүү улуустааҕы филиала, улуус дьаһалтатын дьиэ кэргэн уонна ыччат политикатыгар салаата, үөрэх, култуура улуустааҕы управлениелара, «Оҕо саас сирдьиттэрэ», «Уус Алдан кэскиллэрэ» хамсааһыннар уонна улуустааҕы кииннэммит бибилэтиэкэ, “Өркөн” оҕону эбии үөрэхтээһин киинин үлэһиттэрэ, Е.Ф. Габышев аатынан оҕо спортивнай оскуолата тэрийэн ыыттылар уонна эгэлгэ бириистэри спонсордаатылар.
Дьиэ кэргэттэргэ анаммыт тэрээһин чахчы чэбдик олоххо, биир хамаанда буоларга көҕүлээн, тэрээһин кыттыылаахтара үөрэ-көтө оонньоон, күлэн-салан, сүүрэн-көтөн, өссө биир ситиһиилэнэн, өттүк харалаах сүргэлэрэ көтөҕүллэн тарҕастылар.
Мария Аргунова