Балаҕан ыйын 15 күнүгэр И.С. Портнягин аатынан Сыырдаах орто оскуолатыгар В.М. Прокопьев аатынан
Тумул орто оскуолатын 7-11 кылааһын үөрэнээччилэрэ уонна учууталлара, дириэктэр Константин Михайлович Копырин, Улуу Кыайыы 80 сылыгар анаммыт бэлиэ күнү, тэрийээччи, нэһилиэк мусуойун салайааччыта Акулина Степановна Сокольникова салайааччылаах үгэс буолбут велосипедынан айаҥҥа турунан кэлэн ыалдьыттаан бардылар. Тэрээһин кыттыылаахтара улууспут ытык сирдэринэн сылдьан аастылар.
Айаҥҥа барыта 24 оҕо, 12 үлэһит кыттыыны ылан, биһиги Улуу өбүгэбит Майаҕатта Бэрт Хара төрөөбүт үөскээбит Кыыс Хаҥа алааһыгар сылдьан, кини олоҕун туһунан сэһэни сиһилии истэн, өбүгэбит аатын үйэтитэр пааматынньыкка сылдьан аастылар. Оҕолор олус интэриэһиргээн көрдүлэр, сэҥээрэн иһиттилэр, өйдөбүнньүк хаартыскаҕа түстүлэр. Киэһэ оскуолаҕа хонордуу кэлэн, киэҥ бырагыраамалаах тэрээһиҥҥэ көхтөөхтүк кыттан, оҕолордуун билсэн, доҕордоһон күннэрин түмүктээтилэр.
Айан иккис күнүгэр сылайары аахсыбакка, уһун унньуктаах айантан саллыбакка, төрөөбүт дойдубут тыыннаах айылҕатын ыраас салгынынан астына, дуоһуйа, эҕирийэ тыынан, элбэҕи эбиммит дьон быһыытынан, олохторун устатын тухары өйдөбүнньүк буолар туһалаах айантан үөрэн-көтөн, инникитин икки өттүттэн оскуоланан шефтэһэр баҕа санаалаах, сарсыарда эрдэттэн тэринэн төрөөбүт нэһилиэктэригэр айаҥҥа туруннулар. Махталынан, тапталынан, этэҥҥэ айаннаан тиийэргитигэр.
Ньургуяна Хорунова, иитэр үлэҕэ дириэктэри солбуйааччы