Дьокуускай куоракка «Малый бизнес для большой семьи» диэн биэс күннээх үөрэхтээһин бырайыага түмүктэннэ. Бу биэс күн иһигэр Дьокуускайтан уонна республикабыт улуустарыттан элбэх оҕолоох дьиэ кэргэн бэрэстэбиитэлэ – 20 киһи кытынна. Кинилэр урбаан дьыалатыгар үөрэнэн, бэйэлэрин бырайыактарын көмүскээтилэр.
Бастыҥ бырайыактар барыта 350 тыһ. солк. суумалаах граны ыллылар. Манна биир дойдулаахпыт, Мүрү 1-гы N-дээх орто оскуолатын учуутала Варвара Бурцева ааптарыскай сахалыы ойуулаах, суруктаах брендын биһирээтилэр, уонна 100 тыһыынча солк. суумалаах граны туттардылар.
Салгыы бу бырайыакка кыттыытын туһунан Варвара бу курдук кэпсээтэ:
– Олус интэриэһинэй тэрээһин сылын аайы ыытыллар, быйыл 5-с сыла. Бэйэ дьоҕус дьыалалаах дьоҥҥо сөптөөх, саҥа хардыы оҥорор дьон элбэх билиини ылан бараллар. Туһалаах лекциялар, ону таһынан урбаанньыттары кытары көрсүһүүлэр буолаллар. «Мин бизнеһим» өҥө оҥорор киин олус элбэх үөрэҕи ыытар, ол курдук «Ийэ урбаанньыт», «Аҕа урбаанньыт», «Элбэх оҕолоох ыал урбаанньыт», «Оҕо урбаанньыт» уонна «Аҕам саастаах» урбаанньыт диэн салааларынан.
Мин маннык үөрэххэ иккис кыттыым, 2023 сыллаахха «Ийэ урбаанньыт» салааҕа ситиһиилээхтик кыттыбытым. Оттон быйыл бэйэ уопутун көрдөрө, билиһиннэрэ, дьону-сэргэни кытта алтыһа, үүнэ-сайда диэн барбытым. Кыайыылаахтар истэригэр киириэм дии санаабатаҕым. Ааппын ааттаабыттарыгар олус долгуйбутум, сүрүн үлэм таһынан дууһам сытар үлэтин сыаналаабыттарыгар экспердэргэ махтанабын. Олус сыаналаах сүбэлэри биэрдилэр, салгыы сайдарбар төһүү күүс буоллулар.
Мария Аргунова