Юра уол Туяра Жиркова уонна Павел Охлопков улахан оҕолоро. Гимназия үөрэнээччитэ, быйыл 9-с кылааһы эксээмэннэрин үчүгэйдик туттаран бүтэрдэ. Туймаада ыһыаҕар аҕатын кытта тимири уһаарыы норуоттар икки ардыларынааҕы күрэһин көрө тиийбитигэр, “бачча кэлэн баран кыттан бар” диэбиттэрин ылынан, туох да бэлэмэ суох да тиийдэр, онтон-мантан туттар тэрил уларсан, быһах охсубута уонна тута иккис миэстэни ылан аҕатын да соһуппута, бэйэтэ да соһуйбута!
Юра аҕатын кытта быһах охсорго дьарыктанар эбит. Быһаҕын атыылаан дьиэтээҕи бүддьүөтүгэр көмө буолар. Ити күрэскэ кыттан эмиэ ботуччу бириэмийэни ылан, дьонун үөрдүбүтэ. Салгыы дьарыктанар былааннаах. Аҕатыгар дьиэҕэ-уокка, оҕуруокка, куурусса, хаас, индюк көрүүтүгэр улахан көмө киһи. Сайын аайы оттоһор – тыраахтарынан оҕустарар, мустарар.
Юра – Арассыыйа үтүөлээх образцовай кэлэктиибин “Кэнчээри” народнай ансаамбылын солиһа. Улуу композиторбыт Захар Степанов музыкатыгар, улуу ырыаһыппыт Иван Степанов репертуарыттан “Лена Эбэм” ырыатын толорон өрөспүүбүлүкэтээҕи куонкуруска лауреат буолан турардаах. Аҕата Павел Михайлович – саксофонист, ырыаһыт, дэгиттэр талааннаах уус, спортсмен.
«Кэнчээри» ансаамбыл хоровой искусствоҕа Уһук Илиҥҥэ кыайан, быйыл күһүн Бүтүн Арассыыйа финалыгар бастыҥ хоровой кэлэктииптэрин куонкуруһугар кыттарга ыҥырыллыбыта, Юра онно барсарга бэлэмнэнэн репертуары үөрэтэ сылдьар.
Доҕоттор, биир кэскиллээх дэгиттэр талааннаах уолбутугар ситиһиини, дьоллоох олоҕу баҕарыаҕыҥ!
Василий Парников