Ыал буолан, оҕо төрөтөн, тапталга бигэнэн өйдөһөн-өйөһөн бииргэ олорор, холобур буолар дьиэ кэргэттэри чиэстиир «Дьоллоох дьиэ кэргэн – олох төрдө» тэрээһин ахсынньы 26 күнүгэр буолла. Бу мааны тэрээһин Россияҕа биллэриллибит Дьиэ кэргэн, өрөспүүбүлүкэбитигэр Оҕо саас, улууспутугар Аҕа сылларыгар ананна.
Тэрээһини дьиэ кэргэн сыаннастарын тарҕатыыга, көлүөнэлэр сибээстэрин бөҕөргөтүүгэ, дьиэ кэргэни сомоҕолуурга, ийэ уонна аҕа оруолун үрдэтэргэ туһаайан, 50, 55, 60 сыл бииргэ олорбут ытык-мааны ыаллары чиэстээтилэр. Кэлбит ыалдьыттары өр сылларга улуустааҕы ЗАГС тэрилтэтигэр үлэлээбит республика уонна улуус коллекционердарын чилиэнэ Анна Федорова урукку сыллартан муспут урууга ыҥырыы, эҕэрдэ открыткаларын быыстапката уонна улуустааҕы кииннэммит бибилэтиэкэ туруорбут дьиэ кэргэн сыаннастарын көрдөрөр истиэндэтэ, биирдиилээн дьиэ кэргэн быыстапката умсугута көрүстэ.
Ытык-мааны кэргэннии дьону улуус баһылыга Василий Аммосов уонна баһылыгы солбуйааччы Анатолий Сторожев эҕэрдэлээтилэр уонна эҕэрдэ суруктары, сибэкки дьөрбөлөрүн, өйдөбүнньүк бэлэхтэри ууннулар. Салгыы эҕэрдэ тылы Гражданскай турук аактатын суруйуу управлениетын Уус Алданнааҕы салаатын салайааччыта Надежда Захарова эттэ уонна 50 сыл бииргэ олорбут ыал дьону «Уус Алдан улууһун көмүс ыаллара» бочуот кинигэтигэр сурукка хаалларар үөрүүлээх түгэҥҥэ ыҥырда. Итиэннэ эҕэрдэ тылы бэтэрээннэр сэбиэттэрин бэрэсэдээтэлин собуйааччы Мария Фомина, улуус дьаһалтатын дьиэ кэргэн уонна ыччат политикатыгар салалтатын начаалынньыга Валентина Андросова эттилэр.
Үөрүүлээх тэрээһиҥҥэ улууспут араас нэһилиэктэриттэн кэлбит, сүүс-сүүстэриттэн өйөһөн өр сылларга бииргэ олорон кэлбит ытык-мааны дьоммут ыллаан-туойан, эдэр саастарын эргитэн вальска уйдаран, сынньанан, сэргэхсийэн тарҕастылар. Тэрээһин улуус дьаһалтатын иһинэн үлэлиир Дьиэ кэргэн уонна Ыччат политикатын салалтатын тэрийиитинэн улуустааҕы дьахталлар сэбиэттэрин, «Олоҥхо дьиэтэ» этно-культурнай киин, «Тойон Мүрү» култуура дыбарыаһын, «Россия ийэлэрэ» хамсааһын улуустааҕы филиалын, кииннэммит бибилэтиэкэ тиһигин, «Умсулҕан» коллекционердар түмсүүлэрин көмөлөрүнэн ыытылынна.
Мария АРГУНОВА