Алтынньы 7-9 күннэригэр Уус Алдан улууһугар гражданскай көмүскэл ыйын чэрчитинэн былааннаммыт команднай-штабной үөрэхтэр ыытылыннылар. Бу тэрээһин ыксаллаах быһыы-майгы тирээтэҕинэ куттал суох буолуутун дьиҥнээх тургутуута.
КЧС уонна ОПБ эппиэттээх сэкирэтээрэ Василий Макаров салайааччылаах улуус гражданскай көмүскэл күүстэрэ үрдүк бэлэмнээх режимҥэ үлэлээтилэр. Үөрэх сүрүн хайысхата — штаб үлэтэ, ыксаллаах быһыыга-майгыга нэһилиэнньэ уталыппат маҥнайгы дьайыылара, куттал суоһаабат сиригэр тиийии үөрэҕин ыытыы, бастакы суһал көмөнү оҥоруу.
“Внимание всем!” диэн нэһилиэнньэни бүттүүн хабар иһитиннэрэр түрүлүөн тыаһын тургутан көрдүлэр, алтынньы 9 күнүгэр 10 чаас 43 мүнүүтэҕэ тыаһатан ылбыттара, ону таһынан тэлэбииһэринэн сүрүн ханааллар биэриилэрин быһан туран көрдөрөр уонна иһитиннэрэр информация ыыта сылдьыбыттар.
Ыксаллаах кэмҥэ быстах кэмҥэ олохсуйар пууннары тэрийии бэлэмнээҕэ бэрэбиэркэлэннэ. Сулууспалар бэлиэтээбиттэринэн, улууска 10 тыһыынча киһиэхэ диэри дьиэ уонна итии аһылык биэриитин хааччыйар эбийиэктэр бааллар.
Бэлэмнэнии иһинэн ыксаллаах быһыы-майгы усулуобуйаларын үөскэтиини сэрэтэр уонна туоратар, баһаартан куттал суох буолуутун хааччыйар хамыыһыйа мунньаҕын улуус баһылыга Василий Алексеев салайан ыытта. Мунньахха туһааннаах тэрилтэлэр салайааччылара бары кыттыыны ыллылар.
Үс күннээх тэрээһин иһинэн мунньах кыттыылаахтара команднай-штабной үөрэххэ бэлэмнэнии боппуруостарын дьүүллэстилэр, нэһилиэнньэ олоҕун куттал суох буолуутун хааччыйыыга үлэлиир тэрилтэлэр салайааччылара кыттыыны ыллылар. Үөрэҕи ыытыыга тэриллибит оробуочай бөлөх үөрэх кэмигэр хамыыһыйа чилиэннэрэ улуус тас өртүгэр тахсыа суохтаахтар, бары үлэ миэстэлэригэр баар буолуохтаахтар диэн ирдэбил турда.
Түмүккэ бэрэбиэркэ үрдүк таһымҥа ааспытын бэлиэтээтилэр. Видеосибээһинэн гражданскай көмүскэл уонна нэһилиэнньэҕэ куттал суоһаабат олоҕу-дьаһаҕы хааччыйыы миниистирэ Дмитрий Лепчиков, МЧС Саха Өрөспүүбүлүкэтин сүрүн салалтатын начальнига Павел Гарин гражданскай көмүскэл күүстэригэр сыһыаннаах үлэһиттэрэ бэрэбиэркэ этэҥҥэ түмүктэммитинэн эҕэрдэлээтилэр.