Муус устар 22 күнүгэр Уус Алдан улууһун дьаһалтата уонна Кытай Норуодунай Өрөспүүбүлүкэтин Хэйлунцзян провинциятын Фуюань уеһын Народнай правительствота доҕордуу сибээһи сайыннарыыны уонна хардарыта үлэлэһиини кэҥэтиигэ саҥа сөбүлэҥи түһэристилэр. Бу докумуон икки өттүттэн сыһыан саҥа таһымҥа тахсарыгар сүҥкэн суолталаах. Сөбүлэҥ сүрүн хайысхалара экономика, эргиэн салааларын хабаллар, култуура, үөрэх, туризм уонна спорт сайдыытыгар туһуланаллар.
Бу доҕордуу сыһыан тирэҕэ өссө 2015 сыллаахха Харбиҥҥа Арассыыйа уонна Кытай 2-с ЭКСПО быыстапкатын кэмигэр түстэнэн, оччолорго үлэ ситимэ олохтонон, хардарыта сырыылар буолбуттара, үөрэх, спорт эйгэтигэр холбоһуктаах үлэлэр ыытыллыбыттара, учууталлар, тренердэр уонна специалистар уопут атастаһыылара ситиһиллибитэ. Ону тэҥэ балык бородууксуйатын оҥорон таһаарыыга үлэлэһии саҕаламмыта. Ити барыта доҕордуу сыһыаны салгыы кэҥэтэргэ икки өттүттэн интэриэс баарын көрдөрдө.
Биһиги бу сибээһи доҕордоһуу бэлиэтин эрэ курдук буолбакка, уһун болдьоххо бииргэ үлэлэһии тутаах механизмын быһыытынан көрөбүт. Үөрэххэ, култуураҕа, спорка уонна ыччат икки ардыгар уопут атастаһыыга Фуюань уеһын кытта сыһыаны салгыы сайыннарыыга, хайысхаларын кэҥэтиигэ, нуучча уонна кытай тылларын үөрэтиигэ холбоһуктаах бырайыактары өйүүр сөбүлэһиини түһэристибит», – диэн улуус баһылыгын бастакы солбуйааччы Семен Бурнашев бэлиэтээтэ.
Улуус дьаһалтатын пресс-сулууспата