Дойду президенэ Владимир Путин ыйааҕынан олоххо киирэр «Демография» национальнай бырайыак чэрчитинэн «Спорт – норма жизни» федеральнай бырайыагын иһинэн «Бизнес-спорт» («Я выбираю спорт») бырайыагынан улууспутугар Баатаҕай нэһилиэгэр – ГТО, 1-кы Хоро нэһилиэгэр «Умная спортивная площадка» диэн ааттанар спорт араас көрүҥнэригэр аналлаах аныгылыы былаһааккалар тутуллаллар.
Бэҕэһээ улуус баһылыга Василий Алексеев уонна улуус дьаһалтатын хапытаалынай тутууга уонна архитектураҕа управлениетын начаалынньыга Максим Гуляев I Хоро нэһилиэгэр былаһаакка тутуутун үлэтин хаамыытын билистилэр.
Олохтоохтор субуотунньукка күргүөмүнэн тахсан, былаһаакка тутуллуохтаах сиригэр бетонун кута сылдьаллар. Тутуу балаҕан ыйыгар түмүктэнэрэ былааннанар.
Бу саҥа спортивнай былаһаакка үлэҕэ киирдэҕинэ, нэһилиэнньэ баскетболунан, волейболунан, мини-футболунан дьарыктанарыгар сөптөөх усулуобуйа тэриллиэҕэ, итиэннэ эти-хааны чэбдигирдэр тренажердар турдахтарына, олохтоохтор чэбдик, чөл олоҕу тутуһалларыгар, доруобуйаларын бөҕөргөтөллөрүгэр бигэ тирэх буолуоҕа.
Улуус дьаһалтатын пресс-сулууспата