Улуустааҕы түмэл оскуола үөрэнээччилэригэр анаан сонун тэрээһиннэри ыытар. Бу күннэргэ түмэл мэтэдьииһэ Маргарита Крылова үөрэнээччилэр саха тылын билиилэрин хаҥатыыга, сайыннарыыга, тыл сөпкө тутуллуутугар аналлаах «Төрөөбүт тыл сүмэтэ – түмэлгэ» дьарыгы биир уруок устата ыытар.
Бастакынан Мүрү 1 №-дээх орто оскуолатын 7 «а» кылааһын үөрэнээччилэрэ (кылаас салайааччыта М.Г. Аржакова) дьарыкка сырыттылар. Маргарита Ивановна оҕолору хамаандаларга арааран саха иһиттэрин ойуутун пазлтан сөпкө таҥыыга куоталаһыннарда. Ойууга тахсыбыт иһит туохха туттулларын оҕолор быһаардылар.
Ол кэнниттэн түмэл экспонаттарын кэрийэн сахалыы аат тылы суруйдулар. Хайа хамаанда элбэх тылы булбутунан түмүк таҕыста. Интэриэһиргии көрбүт экспонаттарын туһунан тугу билэллэрин кэпсээтилэр. Оонньуу көрүҥүнэн барбыт дьарык бэрт түргэнник түмүктэннэ. Оҕолор төрөөбүт тылларын байытан тарҕастылар.
Түмэлгэ дьарык салҕанар. Оскуолалар үөрэнээччилэрин түмэл үлэһиттэрэ күүтэллэр.
Елена Сыроватская, уопсас. кэрэсп.