Сылын аайы бу кэмҥэ аан дойду үрдүнэн ыытыллар «Үрүҥ торуоска» диэн көрбөттөргө аналлаах декада бүгүн Уус Алдан улууһугар саҕаланна.
Ол чэрчитинэн киин бибилэтиэкэҕэ «Сырдыгынан сыдьаайан» тэрээһин буолла. Манна улуустааҕы социальнай управлениеттан, социальнай пуондаттан исписэлиистэр кэлэннэр хараҕынан инбэлииттэргэ туох чэпчэтиилэр, туттар тэриллэр тустарынан кэпсээтилэр. Онон инбэлииттэр мунаарар боппуруостарын ыйыталаһан хоруй ыланнар астыннылар.
Салгыы сэргэх кэпсэтиилэр, оонньуулар буоллулар. Ордук Майаҕас бибилэтиэкэрэ Ксения Кириллина бэйиэт Иван Горнай туһунан бэсиэдэтин сэргээтилэр. Ону тэҥэ викторинаҕа оонньоотулар. Дьиэлэриттэн улаханнык тэйбэт дьон маннык мустаннар чахчы сэргэхсийдилэр. Урукку маллар туһунан кэпсээннэр ааспыт кэмнэрин санаттылар.
Көрбөттөр уопсастыба биир кэккэтэ буолан тэҥҥэ сылдьалларын туһугар «Үрүҥ торуоска» декада улахан төһүү буолар.
Афанасий Сектяев