Быйылгы сылтан саҕалаан Өрөспүүбүлүкэтээҕи 2№-дээх клиническэй балыыһа хирург, анестезиолог-реаниматолог, колопроктолог, оториноларинголог, эндоскопист, УЗИ быраастара Г.Г. Никифоров аатынан улуустааҕы киин балыыһа туруорсуутунан (кылаабынай быраас Сергей Черкашин) бу күннэргэ иккис төгүлүн кэлэн, үгүс ыарыһахха быһаччы көмөнү миэстэтигэр оҥороллор. “Хирурдар мобильнай биригээдэлэрэ” курдук өрөспүүбүлүкэ улуустарын олохтоохторугар олус наадалаах туһалаах көрүҥүнэн эмтээһини СӨ Ил Дархана Айсен Николаев кэлиҥҥи сылларга олоххо киллэрэн, үгүс киһи, ыарыһах махталын ылла.
Ол курдук, алтынньы 3-14 күннэригэр диэри СӨ үтүөлээх бырааһа, РФ, СӨ доруобуйаҕа харыстабылын туйгуна Саргылана Ильина салайааччылаах биригээдэ хас да көрүҥ операцияны оҥордулар. Саргылана Алексеевна абдоминальнай хирург быһыытынан үөс тааһын, ис грыжатын ылыыга, СӨ доруобуйаҕа харыстабылын туйгуна, сосудистай хирург Алексей Слепцов флебоэктомия эпэрээссийэтин, ол эбэтэр варикоз ыарыытын утары, колопроктолог Лена Кривошапкина оһоҕос ыарыыларын, геморройу утары, травматолог-ортопед Айал Винокуров таас, өттүк эпэрээссийэтин, оториноларинголог Иннокентий Тастыгин септопластиканы – мурун сүһүөҕүн көннөрүүнү, анестезиолог-реаниматолог Александр Васильев эпэрээссийэ кэмигэр барытыгар үлэлээн, эндоскопист быраас Арианна Тарасова ФГДС, колоноскопия оҥорон, ыарыһахтарга олорор сирдэригэр үрдүк хаачыстыбалаах, таһымнаах 60 эпэрээссийэни, чинчийиини оҥордулар. Ыарыһахтары икки ый устата улуустааҕы киин балыыһа хирурдара, терапевтара, олохтоох ВАП, ФАП эмчиттэрэ бэлэмнээн киллэрдилэр. Ону тэҥэ, биллэриинэн истэн суһаллык көрдөрүнэн кэлбиттэр эмиэ бааллар. Эпэрээссийэҕэ туттуллар оборудованиены, туһаныллар медицинскэй матырыйааллары Өрөспүүбүкэтээҕи 2№-дээх балыыһа бэйэтэ хааччыйда.
Командировкаҕа кэлбит эмчиттэр улууспут балыыһатын хиругия салаатын коллективын (сэбиэдиссэй, хирург Дмитрий Петухов) түмсүүлээх үлэтин бэлиэтээтилэр. Итиэннэ улуус оториноларинголог бырааһа Марфа Устинова сөптөөх диагноһы туруорбута ыйылынна.
Оттон палаталарга сытар ыарыһахтартан эпэрээссийэ кэнниттэн туруктарын, төһө өр ыалдьан эпэрээссийэҕэ киирэргэ санаммыттарын туһунан ыйыталастыбыт. Кэпсэппит ыарыһахтарбыт бары үтүктүспүт курдук маннык курдук өрөспүүбүкэ сүрүн балыыһатын уопуттаах, дириҥ билиилээх быраастара миэстэтигэр кэлэн босхо, сырдык, сылаас, ыраас балыыһаҕа киирэн өр күүттэриитэ суох үгүс сылларга ааллара сылдьыбыт ыарыыларын эмтэтэн, ылларан түргэнник уонна хаачыстыбалаахтык быһаартарбыттарыттапн улаханнык астыммыттарын эттилэр. Итиэннэ маннык көрүҥ эмтээһини биһирииллэрин, сымнаҕас илиилээх үрүҥ халааттаах аанньалларга махтаналларын биллэрдилэр.
Ол курдук атахтара варикоз буолан, өр кэмҥэ эрэйдэммит кэрэ аҥаардар Мүрүттэн Валентина Аммосова, Майаҕастан Надежда Самсонова, Чэриктэйтэн Варвара Бочкарева, Суоттуттан Наталья Герасимова, Сыырдаахтан Александра Портнягина, эр дьонтон Мүрүттэн Петр Куличкин, Суоттуттан Василий Лебедев үтүөрэн астыммыт санааларын үллэһиннилэр. Дьокуускайга киирэн үгүс аналиһы ааһан, хас да төгүл тиэстэн, кырынан айаннаан, уочараттаан көрдөрбөккө, дойдуларыгар ыарыыларын быһаартарбыттара табыгастааҕын бэлиэтээтилэр.
Инникитин да маннык кэлэн, үгүс ыарыһаҕы миэстэтигэр эмтээн, атахтарыгар туруоралларыгар, ыарыыларын ылларан сыыстан ылбыт курдук мүлүрүтэллэригэр баҕа санааларын тиэртилэр.
Светлана Сивцева