Уус Алдан улууһугар сэрии, үлэ бэтэрээннэрин республикатааҕы Сэбиэттэрин знамятын эстафетата бастакы түһүмэҕэ саҕаланна. Бүгүн II Лөгөйтөн саҕалаан Өнөргө, Мүрүгэ знамяны туттарсыы бэлиэ түгэнэ буолла.
Знамяны Мүрүгэ Өнөр нэһилиэгэ аҕалла. Онон көрсүү тэрээһинэ Хос Үрэххэ Кыайыы скверигэр ыытылынна. Манна Мүрү нэһилиэгин олохтоохторо, тыыл, үлэ бэтэрээннэрэ, сэрии сылын оҕолоро кытыннылар.
Бэтэрээннэр улуустааҕы сэбиэттэрин бэрэссэдээтэлэ Иван Колодезников сэрии, үлэ бэтэрээннэрин республикатааҕы Сэбиэтин знамятын күөрэччи тутан миитин түһүлгэтигэр киллэрэн, Мүрү нэһилиэгин бэтэрээннэрин бэрэссэдээтэлигэр Мария Петуховаҕа туттарда.
Биһиги улууспутугар знамя кэлбитинэн эҕэрдэ тылы Иван Колодезников, Мария Петухова, сэрии оҕолорун ааттарыттан Роман Бережнев эттилэр. Знамя салгыы Лөгөй нэһилиэгэр айанныаҕа.
Бу ыйга знамя улууспут 14 нэһилиэгэр ыалдьыттыаҕа, оттон сэттэ нэһилиэк знамяны эстафета иккис түһүмэҕэр – сэтинньигэ көрсүөҕэ. Салгыы уус алданнар знамяны Мэҥэ Хаҥалас улууһугар туттарыахпыт.
Эстафета сыала-соруга: 2027 сылга сэрии, үлэ бэтэрээннэрин республикатааҕы сэбиэттэрэ тэриллибитэ 40 сылыгар ананар, улуустааҕы уонна нэһилиэктэрдээҕи бэтэрээннэр сэбиэттэрин үлэлэригэр саҥа хайысханы киллэрии, үлэлэрин кэҥэтии, көлүөнэлэр быстыбат ситимнэрин сайыннарыы, күүһүрдүү, үүнэр көлүөнэ ортотугар патриотическай үлэни тэнитии, аҕам саастаах көлүөнэ общественнай олоххо кыттыһыыларын тэрийии буолар.
Мария Аргунова