Саха сиригэр ааспыт үйэ 20-с сылларын ортолоруттан анал байыаннай оскуола баар буолбута. Чопчулаан эттэххэ, 1926 сыллаахха өрөспүүбүлүкэ КСК бэрэссэдээтэлэ Платон Ойуунускай этии киллэриитин Сибиирдээҕи байыаннай уокурук салатата ылынан, 1925 сыллаахха Саха сиригэр национальнай байыаннай оскуоланы тэрийэр туһунан бирикээс таһаарбыта. Ол олоххо киирэн, 1926 сыллаахтан бастакы курсаннары ылан, үлэтэ саҕаламмытынан барбыта.
Онон быйыл Саха сиринээҕи национальнай байыаннай оскуола төрүттэммитэ 100 сылын бэлиэтигэр үөрэх министиэристибэтин көҕүлээһининэн оскуола Знамятын эстафетата айаннаата.
Биһиги улууспутугар Нерюнгри улууһун дэлэгээссийэтэ муус устар 22 күнүгэр аҕалан туттарбыт. Онон бүгүҥҥүттэн Знамя улууспут оскуолаларыгар сырыыта Суотту оскуолатыттан саҕаланна.
Знамяны бэтэрээннэр улуустааҕы Сэбиэттэрин бэрэссэдээтэлэ Иван Колодезников салайааччылаах улахан бөлөх илтэ. Манна улуустааҕы оҕо хамсааһынын салайааччыта Мария Винокурова, улуус түмэлин исписэлииһэ Айаал Бурцев,Мүрү 2№-дээх оскуолатын байыаннай-патриотическай кулуубун оҕолоро Алгыс Петров, Кирилл Габышев, Айтал Гуляев, Мүрү 1№-дээх оскуолатын 10-с кылааһын үөрэнээччитэ Ваня Заболоцкай сылдьыстылар.
Өрө күүрүүлээх муусука доҕуһуолунан байыаннай оскуола Знамятын Мүрү 2№-дээх оскуолатын байыаннай-патриотическай кулуубун оҕолоро күөрэччи тутан киллэрэн Суотту оскуолатын эдэр армеецтарыгар туттардылар. Ити кэнниттэн оскуола дириэктэрэ Ирина Петухова эҕэрдэ тылын тиэртэ.
Салгыы Иван Колодезников бэйэтин этиитигэр бу Знамя айана Суоттуттан саҕаламмыта мээнэҕэ буолбатаҕын бэлиэтээтэ. Ол курдук 1941 сыллаахха Аҕа дойду Улуу сэриитигэр биһиги хорсун-хоодуот дьоммут маннааҕы Кыһыл Кырдалга мустан, кылгас байыаннай үөрэҕин баран ааспыттарын аҕынна. Ону тэҥэ бэтэрээннэр Сэбиэттэрэ, кыраайы үөрэтээччи Федот Бысыин уонна улуус хаһыата байыаннай оскуола курсаннарын тустарынан матырыйааллары бэчээттииргэ бырайыак оҥорбуттарын туһунан билиһиннэрдэ.
Салгыы Мүрү 1№-дээх оскуолатын үөрэнээччитэ Ваня Заболоцкай байыаннай оскуола курсаннарын тустарынан дакылаатын, түмэл исписэлииһэ Айаал Бурцев эмиэ ити тиэмэҕэ научнай үлэтин билиһиннэрдилэр. Кинилэр Уус Алдантан байыаннай оскуолаҕа үөрэммиттэр туһунан кэпсээтилэр. Онон историктар даҕаны үчүгэйдик ылсан үөрэтэ илик тиэмэлэригэр үлэлэһэ сылдьалларыттан бэртээхэй кэпсээннэр буоллулар.
Эстафета сарсын Тумул орто оскуолатыгар тиийиэҕэ. Итинник кэрийэн ыам ыйын 5 күнүгэр Чурапчы улууһугар илдьэн туттарыллыаҕа.
Афанасий Сектяев