Орто профессиональнай үөрэхтээһин исписэлиистэрэ – олохпутугар тыын суолталаах үлэни тутар, киһи баарын тухары наадалаах, туһалаах дьыаланан дьарыктанааччылар буолаллар. Бүгүҥҥү күҥҥэ ордук улуус киинигэр Мүрүгэ улахан техника, холобур автобус, КАМАЗ, водовоз, мусоровоз суоппардара тиийбэттэрин, бу өттүгэр эдэр үлэһит илии суоҕун кэриэтин бары да билэбит. Бу кыһалҕа биһиэхэ эрэ буолбатах, бүтүн дойду үрдүнэн турар. Онон бу өттүгэр аҕыйах сылтан бэттэх анал тэрээһиннэр, идэни талыыга туһаайыллыбыт үөрэхтээһиннэр ыытыллар буолбуттарын кэм бэйэтэ ирдээтэ. Онон бүгүн улууспут тэрилтэлэрэ ордук ханнык идэлээх үлэһиттэргэ наадыйалларын туһунан туоһуластыбыт.
Владислав Мухин: “Туйма” ТХПК бэрэссэдээтэлэ:
– Орто анал үөрэх идэлээхтэриттэн биһиэхэ ордук технологтар тиийбэттэр. Эт уонна үүт бородууксуйатын оҥорон таһаарыыга көрдүүбүт, ону таһынан зоотехник тиийбэт, бухгалтериябытыгар даҕаны эдэр үлэһит эбиллэрэ куһаҕана суох буолуо этэ. Бэйэбит үлэһиппитин технолог идэтигэр үөрэттэрбиппит быйыл бүтэрэн, үүт сыаҕар маастар быһыытынан үлэлии сылдьар.
Николай Седалищев, Бороҕоннооҕу РЭС начаалынньыга:
– Биһиги тэрилтэбитигэр үксүн Дьокуускайдааҕы сибээс уонна информационнай технология колледжын электромонтер идэтин бүтэрэн кэлэн үлэлииллэр. Оттон үлэбитигэр сүрүн күүһүнэн буолар крановщик, оператор, буровик, о.д.а. исписэлиистэри бэйэбит тэрилтэбит оҥорон таһаарар киинин иһинэн анаан үөрэттэрэн, каадырдарынан хааччыллабыт. Олохпутугар биир сүрүн үлэ хайысхатын тутар тэрилтэ буоларбыт быһыытынан, анал идэлээх үлэһиттэринэн хааччылларбыт ирдэнэр.
Алгыс Нестеров: “Дүпсүн” ТХППК бэрэссэдээтэлэ:
– Эт уонна үүт бородууксуйатын оҥорон таһаарааччыларга, кырдьык, кыһалҕа биир – ол анал үөрэхтээх технологтары, маастардары кыайан булбаппыт буолар. Маныаха эдэр үлэһиттэргэ сөптөөх усулуобуйаны тэрийии, эрдэттэн үөрэх, үлэһит идэ хайысхаларын оскуолаларга, оҕо саадтарыгар киэҥник сырдатыы, оҕо ылынарын, өйдүүрүн курдук үөрэтии үлэтэ өрүү ыытылла сылдьыан наада дии саныыбын. Үлэһит идэлэр биһиэхэ эрэ буолбатах, ханнык баҕарар салааҕа сүрүн күүһүнэн буолаллар. Сүрүнэ диэн киһи бэйэтэ баҕаран туран, талан ылбыт, сөбүлүүр идэтэ, үлэтэ буолуохтаах.
Евгений Цой, улуустааҕы ДьУоКХ тэрилтэтин салайааччыта:
– Тэрилтэбитигэр сөптөөх, анал үөрэхтээх каадырынан хааччыллыы ортотунан сыаналанар. Барыта 515 үлэһиттээхпит, ол иһигэр 305 киһи орто анал үөрэхтээх. Биһиэхэ ордук орто анал үөрэхтээх инженердэр, бухгалтердар, электросыбаарсыктар, электрослесарьдар, суоппардар наада буолаллар. Маннык идэлэргэ орто анал үөрэх тэрилтэлэригэр анаан үөрэнэн, киһи олоҕор сөптөх суолун, хамнастаах үлэтин булунар кыахтаах. Инникитин да электросыбаарсык, электрослесарь, инженер, слесарь иэдэлээхтэр үлэтэ суох хаалыахтара суоҕа дии саныыбын.
Екатерина Захарова, Мария Аргунова, Анатолий Кириллин