С.Ф. Гоголев аатынан Дьокуускайдааҕы педагогическай колледжка улуус уһуйааннарыгар сэбиэдиссэйинэн үлэлээбит педагогическай үлэ бэтэрээннэрин «Хаачылаана» түмсүүтэ (сал. Наталья Говорова) биирдиилээн үлэлэрин, айар дьарыктарын кэпсиир быыстапканы туруордулар, устудьуоннары кытта көрүстүлэр.
Бу күн биир ураты түгэнинэн «Өркөн» оҕону эбии үөрэхтээһин киинин педагога Евдокия Окоемова «Уһуйааччы сэһэнэ – дойду историята» бырайыагынан оскуола иннинээҕи саастаах оҕолору иитиигэ сүҥкэн кылааты киллэрбит үлэһиттэр ахтыыларын үйэтитэр сыаллаах күн устата устууну ыыттылар. Бырайыак ааптара, салайааччыта Евдокия Окоемова, «Өркөн» оҕону эбии үөрэхтээһин киинин педагога Изабелла Аманатова, IT киин программиһа Максим Свинобоев, Мүрү 2-с нүөмэрдээх орто оскуолатын 7 кылааһын үөрэнээччитэ Мичийэ Бурнашева, 6 кылаас үөрэнээччитэ Василиса Васильева сэбиэдиссэйдэри кытта истиҥник сэһэргэстилэр.
Бастакынан Өлтөх нэһилиэгэр Бэйдиҥэ «Чэчир» уһуйааҥҥа 23 сыл сэбиэдиссэйдээбит СӨ үөрэҕириитин туйгуна Анна Данилова үлэтин, кэлин сынньалаҥҥа тахсан баран хоһоон абылаҥар ылларан биһирэбили ылбыт номнуо үгүс хоһоонноро араас хомуурунньуктарга бэчээттэммит ааптар буола үүммүтүн сэһэргээтэ. Анна Семеновна «Тапталы туойаары бу сиргэ кэлбитим» бастакы кинигэтин 2016 с. таһаартарбыта. Үлэлээх киһи дьоллоох, үлэ – дьол диэн чиҥ өйдөбүллээх бэтэрээн үлэһит киэн тутта кэпсиирэ үгүс. 75 сааһын көрсө «Сырдыкка сирдиир ыллыгым» кинигэтэ ааҕааччыга кэрэхсэммитэ.
Оттон Бэрт Ууһун нэһилиэгэр Сыырдаах «Чуораанчык» уһуйааҥҥа 16 сыл сэбиэдиссэйдээбит, барыта 53 сыл пед. ыстаастаах иитээччи, уһуйааччы, «Сонор» интеллектуальнай оонньуу нөҥүө оҕону иитиигэ хас да үөрэтэр босуобуйа ааптара, РСФСР норуотун үөрэҕириитин туйгуна Клара Садовникова үлэтин, олоҕун анаабыт «Сонор» оонньуу туһунан билиһиннэрдэ. Бу үлэтин түмүгүнэн Клара Спиридоновна Айар педагогика академиятын чилиэнэ буола үүммүтэ. Кини үөрэппит, уһуйбут оҕолоруттан 47 оҕо араас таһымнаах күрэхтэһиилэр чөмпүйүөннэрэ буолбуттара. СӨ бастакы Бэрэсидьиэнэ М.Е. Николаев педагог үлэтин ойуччу тутан бэлиэтээн «Для будущих поколений» (1999 с.) кинигэтигэр киллэрбитэ да үгүһү этэр.
Мүрү нэһилиэгэр Мындааба «Күнчээнэ» уһуйаан сэбиэдиссэйинэн 1985 — 2002 сс. үлэлээбит РСФСР норуотун үөрэҕириитин туйгуна, Мүрү нэһилиэгин бочуоттаах олохтооҕо Мындааба бөһүөлэгин, МТС историяларын суруйууга, 2009 с. олоххо киирбит тырахтарыыс кыргыттарга аналлаах искибиэр тутуутугар сүүрэн-көтөн үлэлэспит Людмила Андросова сэргэх кэпсээнин киһи истэн олоруох курдук. Уопсастыба олоҕор өрүү кыттыһар Людмила Афанасьевна сынньалаҥҥа да мээнэ таах олорбот. Мүрү нэһилиэгин түмсүүтүн актыыбынай чилиэнэ. Кыптыыйын илиитигэр ылла да бииртэн-биир хаар дьикти нарын ойуутун кырыйар. Ыҥырдылар да үөрүүнэн тиийэн хаар быыстапкатын тардан дьону сөхтөрөр. Ийэтин өттүнэн төрүччүнү үөрэтэн «Андросовтар» диэн кинигэни өссө 2009 с. таһаартаран чугас дьонугар бэлэх оҥорон турар.
Үлэни өрө тутан оҕону иитиигэ олохторун анаабыт сэбиэдиссэйдэр: Альбина Свинобоева (Мындааба), Анна Бурцева (Сыырдаах), Светлана Сивцева (Өспөх), Элэһин учаастагын, Бороҕон «Сарыал» уһуйааннар сэбиэдиссэйэ Евдокия Бочкарева, үөрэх управлениетыгар оскуола иннинээҕи саастаах оҕолору иитии отделыгар үлэлээбит Елизавета Сивцева, Екатерина Бурнашева, Лена Троева–Лугинова, Мария Павлова ахтыылара идэни таба тайаныыны, бэриниилээх буолууну дьиҥ чахчы туоһулууллар. Маннык үлэһит дьонноохпутунан киэн туттабыт.
Елена Сыроватская, уопсас. кэрэсп.