Сэһэн Ардьакыап аатынан улуус түмэлин «Рудный след: экспедиция по древним месторождениям Усть-Алданского района» бырайыага ВТБ баан благотворительнай пуондатын граннарга куонкуруһун кыайыылааҕынан буолла.
Бу туһунан түмэл дириэктэрэ Оксана Прядезникова:
– Биһиги бу куонкуруска 1 054 771 солк. суумалаах бырайыагы оҥорон кытынныбыт, ол иһигэр ВТБ баан пуондатыттан үбүлээһин кээмэйэ – 920 423 солк. Бырайыакпыт сүрүн сыала – саха норуотун тимири уһаарыы төрүт ньыматын сөргүтүү, эдэр ыччакка билиһиннэрии, үйэтитии.
Бырайыак чэрчитинэн Уус Алдан улууһугар экспедиция тэриллэн үлэлиэҕэ. Былыргы тимир уһаарыллыбыт сирдэрин үөрэтэн, уустар бэйэлэрэ бу төрүт ньыма туһунан билиилэрин тарҕатыахтара.
«Уус түһүлгэтэ» этно-былаһаакка оҥоһуллан, тимири уһаарарга аналлаах түөрт оһох туруоҕа, экспедицияҕа көстүбүт тимир рудалартан уустар саха быһаҕын оҥорон таһаарар маастар-кылаастары ыытыахтара. Маны таһынан улуус түмэлигэр быыстапка туруоруохпут уонна научнай-практическай конференция ыытыллыаҕа.
Бырайыак олоххо киириитигэр улуус дьаһалтата, тимир уустар түмсүүлэрэ, култуура салалтата, улуус кыраайы үөрэтээччилэрэ күүс- көмө буолуохтара.
Саха норуотун биир төрүт дьарыга умнууга хаалбатын туһугар бу бырайыакпыт сүрүн саҕалааһын буолар.